16 جەلتوقسان كۇنى زاڭسىز اكسياعا قاتىستى دەپ ايىپتالىپ، نۇر-سۇلتانداعى ۋاقىتشا ۇستاۋ يزولياتورىنا 15 تاۋلىككە قامالعان بەلسەندى دۋلات ءاعادىل "تاعى دا ۇستالعانىنا قارسىلىق ءبىلدىرىپ شەگە جۇتقان". بۇل تۋرالى اعادىلمەن بىرگە 10 تاۋلىككە قامالعان بەلسەندى گۇلميرا حالىقوۆانىڭ سوزىنە سىلتەمە جاساعان ازاتتىق راديوسى حابارلادى.

حالىقوۆا ازاتتىق تىلشىسىنە "دۋلات ءاعادىل ادۆوكاتى دانيار اقتانوۆتان 23 جەلتوقسانعا بەلگىلەنگەن قىلمىستىق ءىستى كەيىنگى قالدىرىپ، تاعى دا ۇستالعانىنا قارسىلىق ءبىلدىرۋ ماقساتىندا شەگە مەن بولت جۇتقانىن الەۋمەتتىك جەلى ارقىلى حابارلاۋىن سۇرادى" دەپ ايتقان.  

بۇعان قوسا، حالىقوۆا ازاتتىق تىلشىسىنە مەكەمە ىشىندە ايقاي-شۋدان كەيىن دارىگەرلەر بريگاداسى كەلگەنىن ايتقان. ال جەدەل جەردەمنىڭ انىقتاما قىزمەتى ازاتتىق تىلشىسىنە "دۋلات ءاعادىل شاكىرۇلىنا شاقىرتۋ تۇسكەنىن" راستاعان. شاقىرتۋ قوڭىراۋى 18 جەلتوقسان ساعات 23.46-دا تۇسكەن.

ازاتتىق جازۋىنشا، ولار ءاعادىلدىڭ دەنساۋلىعى جايلى اقپارات الۋ ءۇشىن ۋاقىتشا ۇستاۋ يزولياتورىنا بارعان، الايدا قىزمەتكەرلەر قانداي دا ءبىر اقپارات بەرۋدەن باس تارقان. نۇر-سۇلتان قالالىق پوليسيا دەپارتامەنتى باسپا ءسوز قىزمەتى دە كوممەنتاريي بەرمەگەن.

دۋلات ءاعادىل 16 جەلتوقساندا "بەيبىت شەرۋلەر وتكىزۋ جانە ۇيىمداستىرۋ ءتارتىبىن بۇزدى" دەپ ايىپتالىپ، 15 تاۋلىككە قامالعان. ول 16 جەلتوقساندا نۇر-سۇلتاندا زاڭسىز ميتينگىگە قاتىستى دەپ ايىپتالعان. سول كۇنى الماتى مەن نۇر-سۇلتاندا قالا كوشەلەردە بەيبىت شەرۋگە شىققان ازاماتاردى پوليسيا جاپپاي ۇستاپ، كەيبىرى اكىمشىلىك جازاعا تارتىلعان ەدى. 

13 قاراشادا اقمولا وبلىسى سەلينوگراد اۋدانى تالاپكەر اۋىلىنىڭ تۇرعىنى، بەلسەندى دۋلات ءاعادىلدىڭ وسى اۋدانداعى تەرگەۋ يزولياتورىنان "قاشىپ كەتكەنى" تۋرالى اقپارات الەۋمەتتىك جەلىلەردە تاراعان. كەيىن، 15 قاراشادا ءاعادىل باس پروكۋراتۋرا عيماراتنىڭ الدىنا كەلىپ، يزولياتوردان قاشىپ كەتكەنىن "زاڭسىز قۋدالاۋعا قارسىلىعىم" دەپ تۇسىندىرگەن. ول وسى ارەكەتى ءۇشىن سوت قاۋلىسىن ورىندامادى دەپ ايىپتالىپ، تاعى 6 تاۋلىككە سوتتالعان بولاتىن.