قازاقستان پرەزيدەنتى قاسىم-جومارت توقايەۆ ەلدە پارلامەنتتىك وپپوزيسيا ينستيتۋتى قاجەت ەكەنىن ايتىپ، ۇكىمەتكە ءتيىستى ۇسىنىستار مەن زاڭ جوباسىن ازىرلەپ، پارلامەنتكە ەنگىزۋدى تاپسىردى. توقايەۆ بۇل تۋرالى بۇگىن، 20 جەلتوقساندا وتكەن ۇلتتىق قوعامدىق سەنىم كەڭەسىنىڭ ەكىنشى وتىرىسىنداي ايتتى. 

ونىڭ ايتۋىنشا، بيلىك بالاما پىكىرلەر مەن قوعامدىق تالقىلاۋ توقىراۋدىڭ باسى ەمەس، دامۋدىڭ باستى تالاپتارىنىڭ ءبىرى ەكەنىنە كوز جەتكىزگەن.

- بىزگە پارلامەنتتىك وپپوزيسيا ينستيتۋتى قاجەت. ءبىز جاڭا قوعامدىق پاراديگمانىڭ باستى شارتى بالامالى كوزقاراستار مەن پىكىرلەر ەكەنىن ءتۇسىنۋىمىز كەرەك. سوڭعى جىلدارى ءوز ۇستانىمدارىن اشىق ءبىلدىرىپ جۇرگەن بەلسەندى ازاماتتار ءبىرقاتار الەۋمەتتىك-ەكونوميكالىق ماسەلەنى شەشۋگە اتسالىستى. ءبىز بالاما پىكىرلەر مەن قوعامدىق تالقىلاۋ توقىراۋدىڭ باسى ەمەس، دامۋدىڭ باستى تالاپتارىنىڭ ءبىرى ەكەنىنە كوز جەتكىزدىك. سوندىقتان پارلامەنتتەگى ساياسي ازشىلىقتىڭ نەگىزىن زاڭ جۇزىندە بەكىتۋ قاجەت، - دەدى توقايەۆ.

پرەزيدەنت بۇل ءۇشىن پارلامەنت تۋرالى زاڭدى ساياسي ازشىلىققا كەپىلدىك بەرەتىن نورمالارمەن تولىقتىرۋ قاجەت ەكەنىن اتاپ ءوتتى. 

"مىسالى، باسقا دا پارتيالاردىڭ وكىلدەرى پارلامەنتتەگى كەيبىر كوميتەتتەردىڭ ءتوراعاسى لاۋازىمىن يەلەنە الاتىنداي جاعداي جاساۋ كەرەك. بۇل بيلىكتىڭ زاڭ شىعارۋ تارماعىنداعى بالامالى قىزمەتتىڭ جۇيەلى جۇمىسىن قامتاماسىز ەتۋگە مۇمكىندىك بەرەدى"، - دەدى ول.

كەڭەس وتىرىسىندا توقايەۆ وسى جانە باسقا دا باستامالار بويىنشا ۇكىمەتكە پرەزيدەنت اكىمشىلىگىمەن بىرلەسىپ، ءتيىستى ۇسىنىستار مەن زاڭ جوبالارىن ازىرلەپ، پارلامەنتكە ەنگىزۋدى تاپسىردى.