قازاقستان رەسپۋبليكاسىنىڭ مادەنيەت جانە سپورت مينيسترلىگى قازاقستان تەاترلار اسسوسياسياسىنىڭ ۇيىمداستىرۋىمەن وتەتىن «ساحناگەر» ۇلتتىق تەاتر سىيلىعى – ەلىمىزدىڭ مادەني كەڭىستىگىن بىرىكتىرىپ قانا قويماي، مەملەكەتىمىزدىڭ كوپۇلتتى تەاتر ونەرىنىڭ دامۋىنا تىرەك بولاتىن كوركەمدىك-ەستەتيكالىق جانە رۋحاني قۇندىلىقتاردى ناسيحاتتاپ، بۇگىنگى تەاتر ونەرى ۇردىسىندەگى جاڭاشىلدىق پەن ساحنالىق ىزدەنىستەردى كوپشىلىككە دارىپتەپ، وسكەلەڭ ۇرپاقتىڭ بويىندا وتانسۇيگىشتىك قاسيەتتەر مەن ەلدىك سەزىمدەردى ارتتىرۋعا جول اشىپ، رەسپۋبليكالىق جانە ايماقتىق تەاترلاردىڭ شىعارماشىلىق كەلبەتىن ساقتاۋ مەن دامىتۋداعى ءرولىن ايقىنداپ، دامىتۋعا مۇمكىندىك تۋعىزىپ وتىرعان بىردەن-بىر ايتۋلى شارا.

ۇلتتىق تەاتر سىيلىعى ەلىمىزدە بيىل ءۇشىنشى رەت ءوز يەگەرلەرىن تاۋىپ، لاۋرەاتتاردىڭ شىعارماشىلىق جەتىستىكتەرى رەسپۋبليكالىق دەڭگەيدە ماراپاتتالدى. ولاردىڭ قاتارىندا دراما، وپەرا، بالەت، قۋىرشاق، جاستار تەاترلارىندا ەڭبەك ەتىپ جۇرگەن، ايىرىقشا دارىنى مەن شىعارماشىلىعى ارقىلى ەل ونەرىنىڭ دامۋىنا ەرەكشە ۇلەس قوسقان كاسىبي ماماندار بار.

سونداي-اق پرەميا-فەستيۆال اياسىندا بيىلعى «جاستار جىلى» شەڭبەرىندە مەملەكەتىمىزدەگى دارىندى جاس ارتيستەردى قولداۋعا ەرەكشە نازار اۋدارىلدى.

ايتۋلى تەاتر بايگەسىندە قازاقستاننىڭ مادەنيەت قايراتكەرى، الماتى قالاسىنىڭ مەملەكەتتىك قۋىرشاق تەاترىنىڭ ديرەكتورى ەسەنالييەۆ تالعات قامقاباي ۇلى رەسپۋبليكاداعى تەاترلار اراسىنان «ۇزدىك تەاتر مەنەدجەرى» جۇلدەسىنە يە بولدى.

تالعات ەسەنالييەۆ تەاتر باسشىسى رەتىندە ىرگەلى ىستەرىمەن قوسا، قازاق تەاتر ونەرى سالاسىندا 20 جىلدان اسا قارىمدى ەڭبەك ءسىڭىرىپ كەلەدى. اتاپ ايتقاندا، م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ەڭبەك جولىن باستاپ، تەاتر مەنەدجمەنتى سالاسىندا ساپالى قىزمەت، اۋقىمدى ءىس-شارالاردى ابىرويمەن وتكىزدى. ع.مۇسىرەپوۆ اتىنداعى اكادەميالىق بالالار مەن جاسوسپىرىمدەر تەاترىندا ديرەكتوردىڭ ورىنباسارى قىزمەتىن دە كاسىبي جوعارى دەڭگەيدە اتقارىپ، مادەنيەت سالاسىنىڭ وركەندەۋىنە ءوز ۇلەسىن قوستى.

بۇگىندە قۋىرشاق تەاترىنىڭ قازاق تەاتر ونەرى كەڭىستىگىندەگى بەدەلىن قالىپتاستىرىپ، رەسپۋبليكالىق، حالىقارالىق دەڭگەيدە ونەر كورسەتۋىنە بارلىق جاعدايدى قاراستىرۋدا. بيىك بەلەستەردى باعىندىرعان ۇجىمىنىڭ العا قويعان باعىتى مەن باعدارى دا ايقىن. ول – قازاقتىڭ قۋىرشاق تەاترى ونەرىن وركەندەتۋ،  كەشەگى مەن بۇگىنگى ءومىر اراسىن ونەردىڭ بيىك شىڭى ارقىلى شىنايى كورسەتە ءبىلۋ. ۇلتتىڭ رۋحاني قاجەتتىلىگىن وتەپ وتىرعان تەاتردىڭ رەپەرتۋارلىق ساياساتىنىڭ اۋقىمى دا كەڭ. رەپەرتۋارداعى وتىزدان استام قويىلىمدار ورىس جانە قازاق تىلدەرىندە كورەرمەن نازارىنا ۇسىنىلىپ وتىر.

2019 جىلدىڭ وزىندە جەتى تەاتر فەستيۆالىندە ۇزدىك ونەر كورسەتىپ، جۇلدەلى ورالعان تەاتردىڭ كوركەمدىك دەڭگەيى مەن شىعارماشىلىق ۇجىمعا قاجەتتى جاعدايدى قاراستىرىپ وتىرعان تالعات قامقاباي ۇلىنىڭ بىلىكتى باسشىلىعى بارشا جاس ماماندارعا ۇلگى. ۇستازدىق جولدا دا ەڭبەك ەتىپ، جاستارعا باعىت بەرىپ قولداۋدا ولشەۋسىز ەڭبەكتەنىپ كەلە جاتقان ىسكەر باسشى، ونەرگە جاناشىر ازاماتتى لايىقتى ماراپاتىمەن بارشا ارىپتەستەرى قۇتتىقتايدى.