الماتىداعى ۇشاق اپاتىنان قازا بولعانداردىڭ اراسىندا Informburo.kz سايتىنىڭ رەداكتورى دانا كرۋگلوۆا دا بار. بۇل تۋرالى ءىnformburo.kz سايتى حابارلادى. 

سايتتىڭ جازۋىنشا، 35 جاستاعى دانا كرۋگلوۆا الماتىدا ىسكەرلىك كەزدەسۋلەرى بولعانىنا قاراماستان، جاڭا جىلدى اتا-اناسىمەن قارسى الۋ ءۇشىن الماتىدان نۇر-سۇلتان قالاسىنا ۇشپاق بولعان. 

"دانا كرۋگلوۆا ناعىز جۋرناليست بولعان ەدى. ول جازعان ماقالالار قوعامدا رەزونانس تۋدىرىپ، رەداكسيانىڭ بارلىق قىزمەتكەرلەرىنە ۇلگى بولاتىن. قاڭتار ايىندا دانا شىعارۋشى رەداكتور بولدى، ال 1 جەلتوقساننان باستاپ تەرگەۋ ءبولىمىن باسقاردى. دانا ادال، باتىل جانە وبەكتيۆتى بولدى. بۇل ءبىزدىڭ بارلىعىمىز ءۇشىن ورنى تولماس قايعى"، - دەيدى Informburo.kz سايتىنىڭ باس رەداكتورى ميحايل دوروفەيەۆ. 

دانا كرۋگلوۆا 1984 جىلى 8 ساۋىردە  دۇنيەگە كەلگەن. ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىن جۋرناليستيكا ماماندىعى بويىنشا بىتىرگەن. 

جۇما كۇنى تاڭعى ۋاقىتتا الماتىدان نۇر-سۇلتان قالاسىنا ۇشىپ شىققان ۇشاق راداردان جوعالىپ كەتكەنى حابارلانعان. اۋەجاي باسپا ءسوز قىزمەتىنىڭ مالىمەتىنشە،  الماتىدان نۇر-سۇلتان قالاسىنا 2100 رەيسىمەن 07:05-تە ۇشىپ،  راداردان جوعالىپ كەتكەن «Bek Air» اۋە كومپانياسىنىڭ ۇشاعىنىڭ بورتىندا 95 جولاۋشى جانە 5 ەكيپاج مۇشەسى بولعان. سوڭعى اقپارات بويىنشا، قازا تاپقاندار سانى 15-كە جەتكەن. ولاردىڭ 14ء-ى اپات بولعان ورىندا قازا تاپسا، بىرەۋى اۋرۋحانادا كوز جۇمعان.