ءال-فارابي اتىنداعى قازۇۋ-دىڭ فيلولوگيا جانە الەم تىلدەرى فاكۋلتەتىندەگى وقۋلارىنان شىعارىلعان 2-كۋرستىڭ 10 ستۋدەنتى مەن ولاردىڭ اتا-انالارى نارازىلىق اكسياسىن ۇيىمداستىردى.

ستۋدەنتتەردىڭ وقۋدان شىعارىلۋىنا 1 جانە 2-كۋرس ستۋدەنتتەرى اراسىنداعى كەلىسپەۋشىلىك سەبەپ بولعان. 1-كۋرس ستۋدەنتتەرى 2-كۋرس شاكىرتتەرىنە ارىز جازعاننان كەيىن 10 ستۋدەنت اۆتوماتتى تۇردە وقۋدان شەتتەتىلگەن.

قامشى ءتىلشىسى اتالعان جايت تۋرالى ۋنيۆەرسيتەتتىڭ باسپا ءسوز حاتشىسى مەن فاكۋلتەت باسشىلىعىنان پىكىر الماق بولىپ ەدى، فاكۋلتەت دەكانىنىڭ ورىنباسارى نۇرلان بەرىكباي ۇلى دەكاننىڭ رۇقساتىنسىز ەشقانداي اقپارات بەرە المايتىنىن ايتتى. ۋنيۆەرسيتەتتىڭ باسپا ءسوز قىزمەتى دە جۋرناليست سۇراقتارىنا جاۋاپ بەرۋدەن باس تارتتى. 

ءاتى-جونىن اتاماۋدى سۇراعان فيلولوگيا فاكۋلتەتىنىڭ وقىتۋشىسى باسشىلىق "ماسەلەنى شەشۋدىڭ باسقا جولىن قاراستىرمادى" دەيدى.

– ستۋدەنتتەرىن تاربيەلەۋدى ءوز ۋاقىتىندا، جۇيەلى، مازمۇندى جۇرگىزبەگەن.  وسى ۋاقىتقا دەيىن جاستاردىڭ اراسىنا بارىپ، قارىم-قاتىناستى رەتتەمەگەن، قاداعالاماعان، ءتىل تابىسپاعان قازۇۋ-دىڭ تاربيە ءبولىمىنىڭ باسشىلارى ستۋدەنتتەر اراسىندا پروبلەما تۋىنداعان كەزدە پەداگوگيكالىق-پسيحولوگيالىق تۇرعىدان زەرتتەپ، ساليقالى تۇردە شەشپەي، بىردەن 10 بىردەي ستۋدەنتتى وقۋدان شىعارىپ جىبەردى. بۇدان بولەك ءالى ساناسى تولىق قالىپتاسپاعان، سترەسسكە شىدامسىز، تاجىريبەسىز جاستاردى «جەلدىڭ وتىنە» لاقتىرىپ، وزدەرىن اقتاپ الىپ وتىر. بۇيرىق شىعارۋعا اسىققان باسشىلىق ءوز ستۋدەنتتەرىنەن وسىنداي وڭاي جولمەن قۇتىلىپ، بۇل ماسەلەنى شەشۋدىڭ باسقا جولىن قاراستىرماعان، – دەدى ءوزىنىڭ ءاتى-جونىن اتاماۋدى سۇراعان فيلولوگيا فاكۋلتەتىنىڭ وقىتۋشىسى.

شەرۋگە شىققان اتا-انالاردىڭ ايتۋىنشا، فاكۋلتەت باسشىلىعى ستۋدەنتتەردى وقۋدان شىعارىلۋ سەبەبىن، جاعدايدىڭ بارىسىن تۇسىندىرمەگەن. سونداي-اق وقۋدان شىعارىلعان ستۋدەنتتەرگە ەشكىم شاعىمدانباعان.

– "الىمجەتتىك جاسادى" دەگەن 2-كۋرس ستۋدەنتتەرى ءوز كىناسىن مويىندامايدى، "تاياق جەدى" دەگەن 1-كۋرس ستۋدەنتتەرى شاعىمدانباعان. ءتارتىپ ساقشىلارىنىڭ قولىنداعى بەينەجازبانى نەگىز ەتىپ العان فاكۋلتەت باسشىلىعى جاستاردى نەگە ديالوگقا شاقىرماعان؟ نە سەبەپتى انىق-قانىعىن ءبىلىپ، تەك كىنالىلەردى عانا جازالاماعان؟ نەگە جاتاقحانادان شىعارىپ، شاكىرتاقىدان ايىرىپ، قاتاڭ ەسكەرتۋ بەرمەسكە؟، – دەيدى شەرۋگە شىققان اتا-انالاردىڭ ءبىرى.

شەرۋگە شىققان ستۋدەنتتەر فاكۋلتەت دەكانى ءومىرحان ءابديمانۇلىنان وقۋدان شىعارىلۋلارىنىڭ سەبەبىن سۇراعاندا، دەكان دۇرىستاپ جاۋاپ بەرمەستەن، اتا-انانى جۇلقىلاپ، ۇرىپ، "سەن دەگەن وتتاما" دەپ دورەكى سوزدەن ايتقان.

وقۋدان شىعارىلعان ستۋدەنتتەردىڭ ءبىرى فاكۋلتەت باسشىلىعى "بىزگە جالا جاۋىپ وتىر" دەگەندى ايتتى.

– 500 ستۋدەنتتىڭ ءارقايسىسى ءبىز ءۇشىن ءوتىنىش جازىپ وتىر. مەن 10 بالانىڭ ىشىندە زارداپ شەگۋشىنىڭ ءبىرىمىن. بىزگە ءارتۇرلى جالالار جابىلىپ جاتىر. ءبارىمىز گرانتتا وقيمىز جانە ۋنيۆەرسيتەت ۇيىمدارىنىڭ بەلسەندى جاستارىمىز. ءبىز  وقۋ ءۇشىن قازۇۋ-عا ارمان قۋىپ كەلدىك. ال فاكۋلتەت باسشىلىعى بۇيرەكتەن سيراق شىعارىپ وتىر. وسى ۋاقىتقا دەيىن 10 ستۋدەنتتىڭ ءبىرى دە جازعى وقۋعا قالىپ نەمەسە سەسسيادان قۇلاپ كورمەگەن. مۇعالىمدەرىمىز دە قولداپ وتىر. وسىنشاما ستۋدەنتكە جالا جاۋىپ وتىرعاندا، قازۇۋ-دىڭ رەيتينگ بويىنشا 227-ورىندا تۇرعانى كىمگە كەرەك؟، – دەدى وقۋدان شىعارىلعان ستۋدەنت.