كوروناۆيرۋسقا بايلانىستى جاپونيانىڭ يوكوگاما پورتىندا  ەكى اپتا كارانتيندە تۇرعان "Diamond Princess"  كەمەسىندەگى قىرعىزستان ازاماتى كوروناۆيرۋس جۇقتىرعان. بۇل تۋرالى بىشكەكتە وتكەن باسپا ءسوز ءماسليحاتىندا قىرعىزستان سىرتقى ىستەر ءمينيسترىنىڭ ورىنباسارى نۇرلان ابدراحمانوۆ ءمالىم ەتتى، دەپ حابارالادى ازاتتىق راديوسىنىڭ قىرعىزستانداعى قىزمەتى. 

ولاردىڭ جازۋىنشا،  قىرعىزستان ازاماتىنىڭ ۆيرۋس جۇقتىرعانىن 26 اقپاندا تاپسىرعان ساراپتاما قورىتىندىسى كورسەتكەن. ءقازىر قىرعىز ازاماتى جاپونياداعى اۋرۋحانالاردىڭ بىرىندە وڭاشا پالاتادا ەم قابىلداپ جاتىر. قىرعىزستاننىڭ جاپونياداعى ەلشىلىگى قىرعىز ازاماتىمەن تۇراقتى تۇردە حابارلاسىپ، جاعدايىن باقىلاپ وتىر.

Diamond Princess كەمەسى 5 اقپاننان بەرى ەكى اپتا بويى يوكوگاما پورتىندا كارانتيندە تۇردى. جاپونيا بيلىگى 19 اقپاندا كارانتين مەرزىمى اياقتالعانىن حابارلاپ، كوروناۆيرۋس انىقتالماعان جانە ونىڭ بەلگىلەرى جوق 500 جولاۋشىنىڭ جاعاعا شىعۋىنا رۇقسات بەردى. كەمە ىشىندە 50 ەلدەن 3700 ادام بولعان. لاينەردە 500-دەن استام ادام ۆيرۋس جۇقتىرعان. بۇل جۇڭگو شەكاراسىنان تىس اۋماقتا Covid-19 ۆيرۋسىن جۇقتىرعانداردىڭ ەڭ ۇلكەن شوعىرى.

بۇل كەمەدە ءتورت قازاقستان ازاماتى دا بولدى. قازاقستان سىرتقى ىستەر مينيسترلىگى كارانتيندەگى Diamond Princess كەمەسىندە بولعان قازاقستاننىڭ ءتورت ازاماتى: ەكى ايەل ەكى نەمەرەسىمەن 21 اقپاندا جاعاعا شىققانىن، ولارعا ۆيرۋس جۇقپاعانىن حابارلاعان بولاتىن. ولار وسى اپتا باسىندا قازاقستانعا ورالعان. دەنساۋلىق ساقتاۋ مينيسترلىگىنىڭ ايتۋىنشا، ولار 14 كۇندىك كارانتينگە جىبەرىلگەن.