«قامشىنىڭ» ەلەكتروندىق حات قورجىنىنا قىزىلوردا وبلىسى سىرداريا اۋدانى ناعي ءىلياسوۆ اۋىلدىق وكرۋگى اكىمى اپپاراتىنان حات كەلىپ ءتۇستى. وندا قوعام بەلسەندىسى، ۇلتتىق قوعامدىق سەنىم كەڭەسىنىڭ مۇشەسى مۇحتار تايجان «ىنتىماعى جاراسقان اۋىلىمىزدىڭ تىنىشتىعىن بۇزدى، سالدارىنان اۋىل تۇرعىندارى اراسىندا ارازدىق تۋىنداپ، ەل دۇربەلەڭگە ءتۇستى» دەلىنگەن. بۇعان دەيىن مۇحتار تايجان اتالعان اۋىل تۇرعىندارى «ەگىندىك جەرلەرىمىزدى دەپۋتات ابزال ەرالييەۆتىڭ ءىنىسى دارحان ەرالييەۆتان قايتارۋعا كومەكتەسۋىڭىزدى سۇرايمىز» دەپ حابارلاسقانىن ءوزىنىڭ facebook پاراقشاسىندا جازعان بولاتىن. «قامشى» پورتالى اكىمدىكتەن كەلىپ تۇسكەن حاتتىڭ ءماتىنىن ەش وزگەرتپەستەن جاريالاپ وتىر. قارسى تاراپ – مۇحتار تايجاننىڭ ايتارى بولسا، ونى دا وقىرمانعا ۇسىنۋعا ءازىر.

قىزىلوردا وبلىسى، سىرداريا اۋدانى ن.ءىلياسوۆ اۋىلى تاۋەلسىزدىك العان 90-شى جىلدارى شارۋاسى تۇرالاپ، قارىزعا باتقان شىعىنى مول ەلدى-مەكەن ەدى.
2004 جىلى شارۋاشىلىقتىڭ تولىق بانكروتقا ۇشىراۋىنا بايلانىستى وعان تيەسىلى جەر اۋماقتارى اۋكسيون ارقىلى ەگىن ەگۋ ماقساتىندا اۋىلشارۋاشىلىعى كاسىپورنىنا ساتىلدى.
ناتيجەسىندە كوپ جىلدىق قارىزى بار، ءتيىمسىز دەپ تانىلعان ن.ءىلياسوۆ اۋىلىنا تيەسىلى ەگىن القاپتارىنا قايتا جان ءبىتىپ، شارۋاشىلىق قايتا تۇلەدى. كۇنى بۇگىنگە دەيىن 5000 گا جەر يگەرىلىپ، شارۋشىلىق جىلىنا 30 000 توننا كۇرىش ءونىمىن بەردى. اۋىلدا 2247 ادام تۇرادى. "ابزال ي ك" كومپانياسى قاراماعىندا 400-گە جۋىق قىزمەتكەر جۇمىس ىستەۋدە. كومپانيا جىل سايىن قازىناعا 120 ملن تەڭگە سالىق تولەيدى. اۋىل، اۋدان الدىنداعى بارلىق الەۋمەتتىك مىندەتتەرىن وتەيدى.
ا.ەرالييەۆ وسى شارۋاشىلىققا باسشىلىق ەتكەن جىلدارى اۋىلدا سپورت كەشەنى، ستاديون، اكىمشىلىك عيماراتى، مەشىت قۇرىلىسىن جۇرگىزدى. مادەنيەت ۇيىنە، مەكتەپكە، بالاباقشاعا كۇردەلى جوندەۋ جاسالدى. اۋىل تولىق اباتتاندىرىلىپ، رەسپۋبليكاداعى ەڭ ۇلگىلى اۋىلعا اينالدى. كومپانيا جىل سايىن اۋىلداعى بارلىق مادەنيەت، سپورتتىق، الەۋمەتتىك شارالارعا دەمەۋشىلىك كورسەتىپ، قولدايدى.
اۋىلىمىز ىنتىماعى جاراسقان، اۋىزبىرشىلىكتە ءومىر ءسۇرىپ جاتقان. ءبىراق، مۇحتار تايجان ەسىمدى ازامات كەلىپ، سول تىنىشتىقتى بۇزدى. سالدارىنان اۋىل تۇرعىندارى اراسىندا ارازدىق تۋىنداپ، ەل دۇربەلەڭگە ءتۇستى. ونىسىمەن قويماي وسى اۋىلدىڭ وسىپ-وركەندەۋىنە تىكەلەي سەپتىگىن تيگىزگەن ازامات، ق ر پارلامەنت ءماجىلىسىنىڭ دەپۋتاتى ا.ەرالييەۆ مىرزانىڭ اتاق-ابىرويىنا نۇقسان كەلتىردى.
مۇحتار تايجاننىڭ جالپاق جۇرتقا جاريا ەتكەن ماعلۇماتتارى تەكسەرىلمەگەن. ناقتى قۇجاتتارمەن راستالماعان. ودان بولەك، الەۋمەتتىك جەلىلەردە جالعان اقپارات تاراتىپ، اۋىل تۇرعىندارى قول قويعان دەگەن ارىز-شاعىمدى جاريالادى. ءبىراق، ونىڭ وزىنە اۋىل تۇرعىندارىنىڭ قاتىسى بولماي شىقتى. ونى تۇرعىندار ناقتىلاي الادى.
ن.ءىلياسوۆ اۋىلدىق اكىمدىگى دە حالىق تا ۇزاق جىلدار بويى قالىپتاسقان شارۋاشىلىقتىڭ جۇيەلى دامۋىنا، تۇرعىنداردىڭ الاڭسىز جۇمىسىن ىستەپ، كوكتەمگى دالا جۇمىستارىنىڭ دايىندالعانىنا مۇددەلىمىز. ەگەر قانداي دا ءبىر داۋ تۋىنداعان جاعدايدا زاڭدى تارتىپپەن قاراۋعا ىقپال ەتۋگە دايىنبىز.