اۋەلى ابدراحمانوۆ ءبىر كۇن بۇرىن ۇكىمەت ساعاتىندا كەڭەس ارمياسىنىڭ شيرەك بولىگىنە جۋىعىن ەتپەن قامتاماسىز ەتكەن قازاقستان ءقازىر سىرتتان ەت ساتىپ الاتىن مەملەكەتكە اينالعانىن اتاپ وتكەن.

دالمە-دال: 

– بۇل – قابىرعا قايىستىراتىن جاعداي. فاكتىنىڭ اتى فاكت. كەڭەس ارمياسىنىڭ شيرەك بولىگىنە جۋىعىن ەتپەن قامتاماسىز ەتكەن قازاقستان ءقازىر سىرتتان ەت ساتىپ الاتىن مەملەكەتكە اينالدى. ءقازىر ەلدە ازىق-تۇلىك دايىنداۋدا جەكە سەكتوردىڭ ۇلەسى ءتيىمدى پايدالانىلىپ وتىرعان جوق، – دەدى ول.

ءبىر ءارپىن دە وزگەرتپەي قايتالاساڭىز دەپۋتات: "قازاقستان ءقازىر سىرتتان ەت ساتىپ الاتىن مەملەكەتكە اينالدى" دەپ تۇر. "م-م-م" دەپ ىمىراسىز اشۋعا باسار ما ەدىڭىز سوسىن. "قۇرتتى" دەپ قۇتىڭىز قاشا سۇرلانىپ سىباپ-سىباپ الار ما ەدىڭىز كەپ-كەپ اقوردا توڭىرەگىن.

بۇندايدا ساپارحان وماروۆتىڭ قازاقستاندا مال شارۋاشىلىعى وركەندەپ تۇر دەگەنگە ساياتىن الگى ءبىر پىكىرى "ءبىراق" دەگىزەدى. سويتسەك، ءماجىلىس دەپۋتاتىنىڭ قابىرعاسى قايىسقان ماسەلەگە بىلدەي اۋىلشارۋاشىلىعى ءمينيسترىنىڭ دە ايتار ءۋاجى دايىن ەكەن. ونى دا تىڭداپ كورىڭىز.

– ەتتى مال شارۋاشىلىعى مەن قوي شارۋاشىلىعى سالالارىنىڭ دامۋ الەۋەتى زور. مۇندا وتباسىلىق فەرمەرلىك شارۋاشىلىقتار ءوندىرىس مودەلىنىڭ نەگىزى بولادى. ولار وتكىزۋ، وقىتۋ جانە ۆەتەرينارلىق قىزمەت كورسەتۋ ماسەلەلەرىندە بىرىگەدى. جەر ءۇستى جانە جەر استى سۋلارىمەن قامتاماسىز ەتىلگەن جايىلىم، اۋىل حالقى تۇرىندەگى ەڭبەك رەسۋرستارى سياقتى بارلىق قاجەتتى رەسۋرستار ەلىمىزدە ەتتى مال شارۋاشىلىعى سالاسىن دامىتۋ ءۇشىن جەتكىلىكتى جانە سالانى ينۆەستيسيالىق تارتىمدى ەتەدى، – دەيدى مينيستر.

جەر استى، جەر ءۇستى سۋلارىنا دەيىن ەسەپكە الىپ، ەڭبەك رەسۋرسى دەپ اۋىل حالقىن ايرىقشا اتاعان ءمينيستردىڭ شىرقىرىعان "شىندىعى" بۇل. ياعني، ينۆەستورلاردىڭ ءوزى ۇيمەلەردەي تارتىمدى سالادا ەتتى مال شارۋاشىلىعىن دامىتۋ جونىندەگى شارالاردىڭ ىسكە اسىرىلۋى مالشى فەرمەرلەردىڭ جاڭا ساناتىن قۇرۋعا مۇمكىندىك بەرەدى دەپ وتىر تاعى.

"اۋىل حالقى ەڭبەك رەسۋرسى" دەگەننەن شىعادى، بۇل رەتتە دە اتالعان ۆەدومستۆو باسشىسىنىڭ ءسوزى ماجىلىسمەننىڭ مالىمدەمەسىنە "قارسى" ايتىلىپ تۇر. ماسەلەن دەيسىز عوي:

"اۋىلداعى ازاماتتاردىڭ مال وسىرۋگە دەگەن موتيۆاسياسى تومەندەپ كەتتى. ءبىرىنشى موتيۆاسيا – كۇندەلىكتى ىشىپ-جەم، ەكىنشى موتيۆاسيا – تويعا مال جيناۋ. ءۇشىنشى موتيۆاسيا– قوناق كۇتۋ. ودان ارتىلاتىن مالدىڭ اۋىل ادامىنا قاجەتى شامالى بولىپ تۇر. ويتكەنى، ول مالدى نارىققا قوسىپ، اقشاعا اينالدىرا المايدى. اۋدان ورتالىقتارىنىڭ جانىندا تۇرعان ادامدار بولماسا، 100-200 كم قاشىقتىقتا تۇراتىنداردىڭ مالدى قالاعا اكەپ وتكىزەتىن مۇمكىندىگى جوق، – دەيدى ءماجىلىس دەپۋتاتى.

باقساڭىز، ەكەۋى دە ۇكىمەتتە ايتىپ وتىر بۇل ءوزارا سۇرىنە-قابىنا "سۇزىسكەن" پىكىرلەردى. اراعا ءبىر كۇن سالىپ. ءبىرى – مال شارۋاشىلىعى دامىپ جاتىر دەپ، اۋىل حالقىن ەڭبەك رەسۋرسى رەتىندە ايرىقشا اتاسا، كەلەسى ءبىرى – بۇل سالانىڭ شارۋاسى شاتقاياقتاپ تۇرعانىن، اۋىل حالقىنىڭ مال باعۋعا ەش قۇلىق تانىتپاي وتىرعانىن ايتادى. 

سوسىن، سەنىڭىز-سەنبەڭىز مينيسترلىك وكىلى: فەرمەرلىك شارۋاشىلىقتار سانىن 20 مىڭنان 65 مىڭعا دەيىن وسۋىنە، ءىرى قارا مال سانىنىڭ 7،4 ملن باستان 11،2 ملن باسقا دەيىن ارتۋىنا، قوي سانىنىڭ 19،1 ملن باستان 24،3 ملن باسقا دەيىن كوبەيۋىنە، سيىر ەتى مەن قوي ەتىن ءوندىرۋ كولەمىنىڭ 672 مىڭ توننادان 902 مىڭ تونناعا دەيىن ۇلعايۋىنا ىقپال ەتەدى دەگەن. مال شارۋاشىلىعىن دامىتۋ جونىندەگى شارالار تۋرالى اڭگىمەسىندە.

ەندى ەكەۋدىڭ "ايتىسىن" وسى ارادان ۇزە تۇرىپ، مينيسترلىك وكىلى اتاعان سيفرلارمەن ماقالانىڭ ءتۇيىنىن قويساق دەيمىز.

بايقاۋىمىزشا، حالقىنىڭ سانى ميلليوندارمەن ەسەپتەلىپ وتىرعان ءسىزدىڭ تاۋەلسىز قازاقستانىڭىز ءۇشىن مال شارۋاشىلىعىندا دا ميلليوندارمەن ماقتانۋ عانا قالىپ تۇرعانعا ۇقسايدى. تەك قازاقتى عانا ەسەپكە الىپ (مولشەرمەن ءدال ءقازىر كەمى 10 ميلليون قازاق بار – ق.ق.) ورا-شولاق ەسەپ جاساساڭىز دا ءبىر ادامعا شامامەن ءبىر باس سيىر ەكى قوي تيەسىلى بولماق (مولشەرمەن ءدال ءقازىر كەمى 10 ميلليون قازاق بار – ق.ق.). بۇل قازاقتىڭ جىلدىق ازىعى تۇرىپتى، ءبىر قىستىق سوعىمىنان اسپايتىن مولشەر دەگەن ءسوز...

تاقىرىپ بويىنشا: "قابىرعا قايىستىراتىن جاعداي": ءماجىلىس دەپۋتاتى بار شىندىقتى ايتتى