ق ر اقپارات جانە قوعامدىق دامۋ ءمينيسترى داۋرەن ابايەۆ 6 ساۋىردەن باستاپ قازاقستاندىق مەكتەپتەر قاشىقتان وقىتۋعا كوشەتىنىن مالىمدەدى، دەپ حابارلايدى قازاقپارات.

– 2020 جىلدىڭ 6 ساۋىرىنەن باستاپ قازاقستاندىق مەكتەپتەر قاشىقتان وقىتۋعا كوشەدى. ءقازىر ءبىلىم جانە عىلىم مينيسترلىگى ۇيىمداستىرۋ تەتىكتەرىن پىسىقتاۋدا. بۇل جونىندەگى بارلىق جاڭالىقتاردى جاقىن ۋاقىتتا حابارلايمىز. سوندىقتان تۇسىنىستىك تانىتىپ، رەسمي مالىمدەمەنى كۇتۋدى سۇرايمىز. ءقازىر مەكتەپتەر مەن مۇعالىمدەردى سۇراقتىڭ استىنا الىپ، ايىپتاۋدىڭ رەتى جوق. بۇل ماسەلە ۇكىمەتتىڭ قۇزىرەتىندە. ءبىز بارلىعىن الدىنا الا حابارلايمىز، – دەدى داۋرەن ابايەۆ ورتالىق كوممۋنيكاسيالار قىزمەتىندە وتكەن بريفينگتە.

ونىڭ سوزىنشە، وسىعان وراي قوسىمشا شارا رەتىندە «ەلارنا» مەن «بالاپان» تەلە ارنالارىنان وقۋشىلارعا ارنالعان ۆيدەو ساباقتار كورسەتىلەدى.

– ءبىراق، بۇل نەگىزگى ەمەس، قوسىمشا شارا. وسىنى قايتالاپ ايتقىم كەلەدى. اتالعان ۆيدەو ساباقتاردى ءبىلىم جانە عىلىم مينيسترلىگى دايىنداعان. ولار «بالاپان» تەلەارناسىندا قازاق تىلىندە، ال «ەلارنادا» ورىس تىلىندە كورسەتىلەدى، – دەدى مينيستر.