الەم بويىنشا 35 كومپانيا مەن اكادەميالىق ينستيتۋت كوروناۆيرۋس ۆاكسيناسىن جاساپ شىعارۋعا جارىسۋدا. ولاردىڭ ىشىندە كەمىندە تورتەۋى ۆاكسينانى جانۋارلارعا سىناقتان وتكىزىپ ۇلگەرگەن، دەپ جازادى theguardian.com.

ونىڭ العاشقىسى – بوستونداعى Moderna بيوتەحنولوگيالىق فيرماسى ادامزاتقا جاقىن ۋاقىتتا قولدانۋعا بولاتىن ۆاكسينالاردى دايىندايتىنىن ءمالىم ەتتى.

عالىمدار بولاشاقتا كوروناۆيرۋستار توبىنا جاتاتىن ۆيرۋستار الەمگە ءقاۋىپ ءتوندىرۋى مۇمكىن دەپ سانايدى.

كوروناۆيرۋستار سالدارىنان قازىرگە دەيىن الەمدە ەكى ەپيدەميا تارالعان. ولار 2002-2004 جىلدارى قىتايدا تارالعان سارس جانە 2012 جىلى ساۋد ارابياسىندا باستالعان مەرس. بۇل – ەكەۋى دە كوروناۆيرۋستار توبى تۋدىرعان جۇقپالى ىندەتتەر.

مەريلەند شتاتىندا ورنالاسقان «نوۆاۆاكس» كومپانياسى دا كوكتەمدە ادامدارعا تەست جاسايتىنىن ايتقان.

پاندەميا دەنساۋلىق ساقتاۋ جۇيەسى ءالسىز نەمەسە جەتكىلىكتى قارجىلاندىرىلماعان ەلدەردە اۋىر ءتيۋى مۇمكىن. ويتكەنى مەملەكەتتىڭ ۆاكسيناعا مۇقتاجدىعى مەن ساتىپ الۋ قابىلەتىنىڭ اراسىنداعى بالانس ولارعا وتە ۇلكەن قيىنشىلىق اكەلۋى مۇمكىن. 

مىسالى، 2009 جىلعى H1N1 تۇماۋى پاندەمياسى كەزىندە، ۆاكسينانى ساتىپ الاۋعا قاۋقارلى ەلدەر پاندەميانى تەز جەڭدى دە، ال قارجىلىق قيىندىقتاعى ەلدەردە ۆاكسينا جەتىسپەۋشىلىگى تۋىندادى.

سونىمەن قاتار، مىناداي سەنارييدى بولجاۋعا دا بولادى: دامۋشى الەمگە ۆاكسينالاردىڭ نەگىزگى جەتكىزۋشىسى – ءۇندىستان، جۇڭگو سياقتى ەلدەر ۆاكسينانى الدىمەن ءوزىنىڭ 1،3 ميلليارد حالقىن قورعاۋ ءۇشىن پايدالانادى، سوسىن عانا ۆاكسينا ەكسپورتىن ويلاستىرادى.

عالىمداردىڭ ايتۋىنشا، پاندەميانىڭ تارالۋى شەگىنە جەتكەندە نەمەسە ازايا باستاعاندا عانا ۆاكسينا جاسالىپ شىعۋى مۇمكىن. سونداي-اق بۇل پاندەميا تۇماۋ سياقتى قايتادان پايدا بولاتىن ەپيدەميا بولۋى ىقتيمال. ونداي جاعدايدا ۆاكسينانىڭ ماڭىزى ءتىپتى كۇشەيە تۇسەدى. كوپ ادامداردىڭ ءومىرىن قۇتقارىپ قالادى.

تالعار دالەلعازى