الماتىدا كارانتين رەجيمى كۇشەيتىلگەلى پوليسيا قىزمەتى بۇرىنعىدان دا قاۋىرت جۇمىس تارتىبىنە كوشكەن. بۇگىندە 1500-گە جۋىق پوليسيا مەن اسكەري قىزمەتشى قالاداعى شەكتەۋلەردىڭ ساقتالۋىن قاداعالاۋدا.
پوليسيا كوشەدە بەيساۋىت جۇرگەن ازاماتتار مەن كولىكتەردىڭ ءارقايسىسىن تەكسەرىپ، جۇرۋگە رۇحساتى بار-جوعىن انىقتاپ جاتىر. رۇحساتسىز جۇرگەن ازاماتتارعا ەسكەرتۋ جاسالىپ، كەلەسىدە اكىمشىلىك قۇقىق بۇزۋشىلىق ءتارتىبى بويىنشا شارا قولدانىلاتىنىن تۇسىندىرۋدە.
قامشى تىلشىسىنە پىكىر بىلدىرگەن پاترۋلدىك پوليسيا قىزمەتكەرى قوعامدىق تارتىپپەن قاتار حالىق اراسىندا ءتۇسىندىرۋ جانە كەڭەس بەرۋ جۇمىستارى جۇرگىزىلىپ جاتقانىن ايتتى.
– ازاماتتار اراسىندا قوعامعا ءتونىپ تۇرعان ءقاۋىپتى ءالى دە ەسكەرمەي، ءتۇرلى ماسەلەلەردى سىلتاۋراتىپ قاجەتسىز سىرتقا شىعاتىندار، وسىلايشا توتەنشە جاعداي جانە كارانتين ەرەجەلەرىن ەلەمەيتىندەر بار، – دەيدى اباي داڭعىلىندا كەزەكشىلىكتە تۇرعان پوليسيا قىزمەتكەرى.
ازىرگە مۇنداي ازاماتتارعا ەسكەرتۋ جاسالۋدا. ءتارتىپ بۇزۋشىلىق قايتالانسا، زاڭ تالابىنا ساي ناقتى شارا قولدانىلادى.
بۇگىنگى كۇننىڭ ناتيجەسىندە ىشكى پوستتارداعى ءتۇسىندىرۋ جۇمىستارى اياسىندا ەكى مىڭ اۆتوكولىك جۇرگىزۋشىسى مەن 350-گە جۋىق ازاماتپەن اڭگىمە جۇرگىزىلگەن.
قامشى تىلشىسىلەرى قالاداعى توتەنشە جاعداي ءتارتىبىن قامتاماسىز ەتىپ جاتقان پوليسيا قىزمەتكەرلەرىنىڭ جۇمىسىنان الداعى ۋاقىتتا دا رەپورتاج بەرەدى.
پىكىر قالدىرۋ