ماڭعىستاۋ وبلىسىنىڭ اكىمى س.ترۇموۆ ءتۇپقاراعان اۋدانىنا جۇمىس ساپارىمەن باردى. الدىمەن اقشۇقىر اۋىلىندا قۇرىلىسى سالىنىپ جاتقان 600 ورىندىق مەكتەپتىڭ جۇمىسىمەن تانىستى. جاڭا ۇلگىدە سالىنىپ جاتقان ءبىلىم ورداسىنىڭ قۇرىلىسى 2019 جىلدىڭ ماۋسىم ايىندا باستالعان. قۇرىلىس جۇرگىزۋشى «اليانس LTD» ج ش س جوسپارعا ساي اعىمداعى جىلدىڭ ماۋسىم ايىندا اياقتاۋدى جوسپارلاپ وتىر. اكىم نىساننىڭ ساپاسىنا اسا ءمان بەرۋدى تاپسىردى. بۇدان كەيىن ءتۇپقاراعان اۋدانىنىڭ اكىمى اقشۇقىر اۋىلىن اباتتاندىرۋ بويىنشا جاسالىپ جاتقان جۇمىستار تۋرالى بايانداپ، ءبىرقاتار نىسانداردى كورسەتتى. ايماق باسشىسى اۋدانعا قاراستى س.شاپاعاتوۆ اۋىلىنا دا باردى. وندا 6 ورامعا ينجەنەرلىك ينفراقۇرىلىم تارتۋ جۇمىسىمەن تانىستى. س.شاپاعاتوۆ اۋىلىندا سۇيىققويما جانە سەلوىشىلىك سۋ قۇبىرىن سالۋ جەلىلەرى مەن جاڭا تۇرعىن ۇيلەردى گازبەن قامتۋ قۇرىلىسىنىڭ 2 كەزەڭى جۇرگىزىلىپ جاتىر. وسىدان كەيىن وبلىس اكىمى «اكتاۋاگرو» ج ش س قۇس فابريكاسىنىڭ قۇرىلىسىمەن جانە سۋ قۇبىرلارىمەن جابدىقتاۋ جۇمىستارىمەن تانىستى. 50 گا جەرگە سالىنىپ جاتقان قۇس فابريكاسىنىڭ جالپى قۇنى 1 450 000 000 تەڭگە. ءبىر مەزەتتە 36 000 قۇس وسىرۋگە بولادى. جوبا ماقساتى: اۋداندا قوڭدى بالاپاندار ءوسىرۋ، وڭدەۋ، سويۋ جانە دايىن قاپتاماداعى ءونىمدى نارىققا شىعارۋ؛

وبلىس نارىعىنا جوعارى ساپالى قۇس ەتىن شىعارۋ؛
شەتتەن اكەلىنەتىن يمپورتتىق ەت ونىمدەرىن 30% عا قىسقارتۋ.
سونداي-اق، وبلىس اكىمى س.شاپاعاتوۆ اۋىلىنىڭ تەڭىز جاعالاۋىن اباتتاندىرۋ بويىنشا سالىناتىن دەمالىس ورنىنىڭ جوباسىمەن تانىستى. كەشەنىنىڭ قۇنى 133 947 مىڭ تەڭگە.

سونىمەن قاتار، ايماق باسشىسى فورت شيەۆچەنكو قالاسىنىڭ كىرەبەرىسىندەگى بلوك بەكەتكە بارىپ، قازىرگى احۋالىمەن تانىستى. بەكەتتە مەديسينا، پوليسيا قىزمەتكەرلەرى بەلگىلەنگەن تارتىپكە ساي كۇزەتشىلىك جاساۋدا. وبلىس اكىمى ءقاۋىپتى ۆيرۋستان ساقتانۋ شارالارىن باقىلاۋدا ۇستاپ، ءتارتىپتى قاتاڭداتۋدى، تۇرعىندارمەن اقپاراتتىق –تۇسىندىرمە جۇمىستارىن جۇرگىزۋدى تاپسىردى.