دۋبايدا جۇمىس ىستەپ جۇرگەن قازاقستاندىق ازاماتشا جۇمباق جاعدايدا كوز جۇمدى. جەرگىلىكتى پوليسيا وتانداسىمىزدىڭ وز-وزىنە قول جۇمساعانىن ايتۋدا. الايدا مارقۇمنىڭ تۋىستارى مۇنىمەن كەلىسپەيدى. ۋميدا سابىروۆا مەكتەپتى ۇزدىك تامامداعان. ونىڭ ۇستىنە جەڭىل اتلەتيكامەن كاسىبي تۇردە اينالىسقان ەكەن. اعىلشىن ءتىلىن ۇيرەنىپ، وتكەن جىلدىڭ تامىز ايىندا بىرىككەن اراب امىرلىكتەرىنە جۇمىس ىستەۋگە كەتكەن. اپكەسى مانزۋرا سابىروۆانىڭ سوزىنشە، ۋميدا ول جاقتا وقۋىنا اقشا جيناپ، جاقىندارىنا دا قارجىلاي كومەكتەسكەن. بۇل تۋرالى ەۋرازيا ءبىرىنشى ارناسى حابارلايدى.
– ءسىڭىلىمنىڭ مۇردەسىن ەلگە جەتكىزسە دەيمىن. ۇشاقتار ۇشىپ جاتىر ەمەس پە؟! مەنى كورىپ تۇرساڭىزدار، بارلىق ەلشىلەردەن، ءبىزدىڭ پرەزيدەنتىمىزدەن كومەك سۇرايمىن!، - دەيدى ۋميدا سابىروۆانىڭ اپكەسى مانزۋرا سابىروۆا.
مانزۋرا سابىروۆا ءسىڭىلىسىنىڭ ءوز ءومىرىن قيعانىنا سەنبەيدى. وعان سەبەپ تە جوق ەمەس. 16 ناۋرىزدا بايلانىسقا شىققان ۋميدا ءوزىن شەتەلدەن الىپ كەتۋدى ءوتىنىپ، باز-بىرەۋلەردىڭ ونى اڭدىپ جۇرگەنىن ايتقان. پاندەميانىڭ تارالۋىنا بايلانىستى ول كەزدە قانداي دا ءبىر شارا قابىلداۋ مۇمكىن بولماپتى. ال ەلىمىزدىڭ سىرتقى ىستەر مينيسترلىگى وسى جاعدايدى باقىلاۋدا ۇستاپ وتىرعاندارىن ايتادى. رەسمي ورگان "مۇردەنى ەلگە جەتكىزۋ ماسەلەسى وسى اپتانىڭ سوڭىنا دەيىن شەشىلۋى ءتيىس"، دەپ جاۋاپ بەردى.
پىكىر قالدىرۋ