جاقىندا عانا پارتيا قۇراتىنىن ايتىپ، پارتياسىنىڭ اتىن "سەن" دەپ قويعانىن جاريالاعان كاسىپكەر احمەتبەك نۇرسيلا "مەن قۇرعان پارتيا ءۇشىن 100 000 ادام دايىن تۇر" دەپ مالىمدەدى. بۇل تۋرالى قامشى ءتىلشىسى حابارلايدى.

ءوزىنىڭ "بيزنەس باستاۋ" دەپ اتالاتىن YouTube ارناسىندا تىكەلەي ەفيرگە شىققان بيزنەس ترەنەردىڭ ايتۋىنشا، ونىڭ كومانداسى پارتيا قۇرۋعا دايىندالعانىنا ۇزاق ۋاقىت بولعان. تىكەلەي ەفيردە احمەتبەك نۇرسيلا ءوزىنىڭ بيزنەسكە تاربيەلەيتىن مەكتەبىنەن 40 000-عا جۋىق ادامنىڭ وقىپ شىققانىن ايتتى. كاسىپكەردىڭ ويىنشا، ونىڭ باستاماسىن بيزنەس مەكتەبىن بىتىرگەن تۇلەكتەردىڭ بارلىعى جانە ولاردىڭ تانىستارى مەن تۋىسقاندارى، دوس-جاراندارى قولدايدى. ال، ولاردىڭ جالپى سانى 100 مىڭعا جەتەتىن كورىنەدى.

–ءبىز ءۇشىن 20 مىڭ ادامدى جيناۋ ءبىر-اق كۇندىك جۇمىس،– دەگەن كاسىپكەر پارتيانىڭ ءبىرىنشى قۇرىلتايى 26 تامىزدا بولاتىنىن ايتتى. ونىڭ سەبەبىن "سول كۇنى قازاقتىڭ تەرريتورياسى بەكىتىلىپ،  ءبىرىنشى رەسپۋبليكاسى قۇرىلعان" دەپ ءتۇسىندىردى.