شىمكەنتتە جاپپاي توبەلەس كەزىندە تاياق جەپ، كوماعا تۇسكەن 17 جاستاعى ابزال وتكىروۆ باس مي جاراقاتىنىڭ اۋىرلىعىنان، ەس جيماعان كۇيىندە قايتىس بولدى، دەپ حابارلادى قازاقپارات.

ا. وتكىروۆ تۇركىستان وبلىستىق بالالار اۋرۋحاناسىنىڭ جانساقتاۋ بولىمىنە اۋىر حالدە جەتكىزىلگەن بولاتىن.

"ناۋقاس 23ء-شى مامىر كۇنى تۇنگى ساعات 01:55-تە مەديسينالىق جەدەل-جاردەم قىزمەتىمەن اۋىر حالدە جەتكىزىلگەن. ناۋقاس اۋىر جاراقات العان بولاتىن. اۋرۋحانا دارىگەرلەرى جەدەل تۇردە ناۋقاستى ءتيىستى مەديسينالىق تەكسەرۋدەن وتكىزىپ، زەرتتەۋلەر جۇرگىزدى. ناۋقاستىڭ ميىنا قان كەتكەنى انىقتالدى. جەدەل تۇردە وتا – دەكومپرەسسيۆتى ترەپاناسياسى جاسالىندى. ناۋقاسقا العان جاراقاتىنا جانە جاعدايىنىڭ اۋىرلىعىنا بايلانىستى قاجەتتى ەم جانساقتاۋ بولىمىندە كورسەتىلگەن. ونى ۇزاق جولعا الىپ شىعۋ ءقاۋىپتى بولعاندىقتان، دارىگەرلەر ۇلتتىق عىلىمي ورتالىعىنىڭ ماماندارىنان تەلەمەديسينا ارقىلى كەڭەس الىپ، ەمدىك شارالاردى جاسادى. الايدا 1ء-شى ماۋسىم تۇنگى ساعات 23:45-تە ءجاسوسپىرىم كوز جۇمدى. كومادا جاتقان كۇيى ەس جيماي قايتىس بولدى"،  دەلىنگەن باسقارما حابارلاماسىندا.

ايتا كەتەيىك، بۇعان دەيىن مارقۇمنىڭ تۋىستارى 22 مامىر كۇنى شىمكەنتتىڭ ىرگەسىندەگى ماياتاس ەلدىمەكەنىندە جاپپاي توبەلەس بولعانىن ايتقان. وندا بولعان ەكى ءجاسوسپىرىم سوققى الىپ، 17 جاستاعى ءجاسوسپىرىم اۋىر جاراقاتپەن اۋرۋحاناعا تۇسكەن.

قازىرگى تاڭدا شىمكەنتتىڭ پوليسيا دەپارتامەنتى توبەلەسكە بايلانىستى قىلمىستىق ءىس قوزعاپ، تەرگەۋ امالدارىن جۇرگىزۋدە.