ق ر ەكولوگيا، گەولوگيا جانە تابيعي رەسۋرستار ۆيسە-مينيسترى ەرلان نىسانبايەۆ ىلە-الاتاۋ ۇلتتىق پاركىندەگى جەرلەر ساتىلمايدى جانە شەتەلدىك كومپانيالارعا پايدالانۋعا بەرىلمەيدىدەدى. بۇل تۋرالى Facebook پاراقشاسىندا جازدى.

"قۇرمەتتى قازاقستاندىقتار!

وزدەرىڭىزگە بەلگىلى، الماتى جۇرتشىلىعى ىلە-الاتاۋى ۇلتتىق پاركىندە ەكو-تۋريزمدى دامىتۋعا قاتىستى ماسەلە كوتەرگەن ەدى.

اتاپ وتسەم، 2019-2025 جىلدارعا ارنالعان تۋريستىك سالانى دامىتۋدىڭ مەملەكەتتىك باعدارلاماسى شەڭبەرىندە شەتەلدىك، ونىڭ ىشىندە اقش-تىڭ تابىستى تاجىريبەسى نەگىزىندە ۇلتتىق پاركتى دامىتۋدىڭ باس جوسپارى جاسالدى. وسىعان وراي، ءوز موينىنا ۇلتتىق پاركتىڭ ينفراقۇرىلىمىن قورشاعان ورتاعا زيان كەلتىرمەي دامىتۋ مىندەتىن العان جاۋاپتى قازاقستاندىق ينۆەستور انىقتالدى.

بىردەن نازار سالاتىن ءجايت، ۇلتتىق پاركتەگى جەرلەر ساتىلمايدى! وزگە ەلدىڭ ازاماتتارى مەن شەتەلدىك كومپانيالارعا پايدالانۋعا بەرىلمەيدى! وعان قازاقستان رەسپۋبليكاسىنىڭ زاڭى بويىنشا تىيىم سالىنعان!

ۇلتتىق پاركتەردىڭ قازىرگى جاعدايىن وزدەرىڭىز كورىپ وتىرسىزدار: كاۋاپحانا، اباجاداي مەيرامحانالار، ساپاسىز قىزمەت، سۇرەڭسىز كورىنىستەر. جاعدايدى تۇبىرىمەن وزگەرتپەي بولمايدى. ءبىرىنشى ورىندا ادام مەن تابيعاتتىڭ بايلانىسى تۇرۋى ءتيىس. تيىسىنشە، جولداردى، كورۋ الاڭدارىن، وزەن ۇستىندەگى كوپىرلەردى، تابيعي ۇندەستىكتى بۇزبايتىن شاعىن نىسانداردى سالۋ كەرەك. وسىنىڭ ءبارىن جولعا قوياتىن قازاقستاندىق ينۆەستورگە جالعا نەبارى 35 گا جەر ۋچاسكەلەرى پايدالانۋعا بەرىلدى.

ينۆەستورمەن كەزەڭ-كەزەڭمەن 10 زاماناۋي ۆيزيت-ورتالىقتار سالۋ، 155 كم استام جاياۋ مارشرۋتتار جايلاستىرۋ جانە تاعى باسقالار جوسپارلانۋدا. جوبا ارالاس سالالاردا جاڭا جۇمىس ورىندارىن قۇرۋعا مۇمكىندىك بەرەدى، كاسىپكەرلىكتىڭ دامۋىن جانە تۋريزم سالاسىنداعى جوعارى بىلىكتى كادرلاردىڭ ءوسۋىن قامتاماسىز ەتەدى.

ينۆەستورمەن بارلىق جۇمىستار قورشاعان ورتاعا زيان كەلتىرمەي ىسكە اسىرىلادى، ال تۇرعىزىلاتىن قۇرىلىمدار زاماناۋي ەكولوگيالىق ماتەريالداردان ازىرلەنەدى.

ايتا كەتەرلىگى، ۇلتتىق پارك بۇرىنعىداي كەز-كەلگەن قازاقستاندىق ءۇشىن قولجەتىمدى بولىپ قالا بەرەدى. ەشقانداي قورشاۋلار بولمايدى.
وسى اپتا بويى الماتى جۇرتشىلىعىمەن، بەلسەندىلەرمەن، جۋرناليستەرمەن كەزدەستىك. حالىقتىڭ بارلىق تالاپ-تىلەگى ەسكەرىلەدى. ناتيجەسىندە ۇلتتىق پارك جانىندا قوعامدىق كەڭەس قۇراتىن بولىپ شەشتىك. ينۆەستوردىڭ بارلىق جۇمىستاردى ساپالى تۇردە ورىنداۋىن ءبىز حالىقپەن بىرگە قاداعالايتىن بولامىز. تابيعاتقا ەشقانداي زالال كەلمەيدى. ول قاتاڭ تۇردە قاداعالانادى" دەلىنگەن جازبادا.