الەكسەي سوي دەنساۋلىق ساقتاۋ ءبىرىنشى ۆيسە-مينيسترى بولىپ تاعايىندالدى. بۇل تۋرالى پرەمەر-مينيسترىنىڭ رەسمي سايتى حابارلادى.

ۇكىمەت باسشىسى سويدىڭ مەديسينا جانە باسقارۋ سالاسىنداعى ۇلكەن جۇمىس تاجىريبەسىن اتاپ ءوتتى. ول مينيستر ەلجان ءبىرتانوۆ ەمدەلىپ شىققانشا دەنساۋلىق ساقتاۋ ءمينيسترىنىڭ مىندەتىن اتقارادى.

اسقار مامين كوروناۆيرۋس پاندەمياسىمەن كۇرەس جاعدايىندا حالىق دەنساۋلىعىن ساقتاۋ بويىنشا دەنساۋلىق ساقتاۋ جۇيەسىنىڭ الدىندا تۇرعان مىندەتتەردى شەشۋدىڭ ماڭىزدىلىعىن اتاپ ءوتتى.

الەكسەي ۆلاديميروۆيچ سوي 1977 جىلى 2 ساۋىردە وڭتۇستىك قازاقستان وبلىسىندا دۇنيەگە كەلگەن. Sells College (لوندون)، قازاقستان مەملەكەتتىك مەديسينا اكادەمياسىنىڭ اسپيرانتۋراسىن، وڭتۇستىك قازاقستان مەملەكەتتىك مەديسينا اكادەمياسىن، «دانەكەر» حالىقارالىق قۇقىق جانە حالىقارالىق بيزنەس ينستيتۋتىن، رف پرەزيدەنتى جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىنىڭ كورپوراتيۆتىك باسقارۋ جوعارى مەكتەبىن ءتامامداعان.

ستەنفورد ۋنيۆەرسيتەتىندە (اقش)، سينگاپۋردا، ماسكەۋدە، گەرمانيادا، ۇلىبريتانيادا جانە ت. ب. ەلدەردە تاعىلىمدامادان وتكەن. ىسكەرلىك اكىمشىلىك دوكتورى، مەديسينا عىلىمدارىنىڭ كانديداتى.

حيرۋرگ-ەندوسكوپيست بولىپ جۇمىس ىستەگەن، قالپىنا كەلتىرۋ حيرۋرگياسى جانە ترانسپلانتولوگيا ورتالىعىنىڭ اعا عىلىمي قىزمەتكەرى، ۇلتتىق عىلىمي مەديسينا ورتالىعىنىڭ ىشكى مەديسينا ورتالىعىنىڭ جەتەكشى عىلىمي قىزمەتكەرى، «ەۋروازياتتىق رەسپيراتورلىق قوعام» قوعامدىق بىرلەستىگىنىڭ باس حاتشىسى، ق ر پرەزيدەنتى ءىس باسقارماسىنىڭ زاماناۋي مەديسينالىق تەحنولوگيالاردى ەنگىزۋ ورتالىعىنىڭ ديرەكتورى، ق ر پرەزيدەنتى ءىس باسقارماسىنىڭ مەديسينالىق ورتالىعىنىڭ باسشىسى، استانا قالاسىنىڭ №1 قالالىق اۋرۋحاناسىنىڭ باس دارىگەرى، ق ر دەنساۋلىق ساقتاۋ جانە الەۋمەتتىك دامۋ ۆيسە-مينيسترى، ق ر دەنساۋلىق ساقتاۋ ۆيسە-مينيسترى قىزمەتتەرىن اتقارعان. 

2019 جىلعى اقپاننان باستاپ وسى ۋاقىتقا دەيىن قازاقستان رەسپۋبليكاسى پرەزيدەنتى ءىس باسقارماسىنىڭ مەديسينالىق ورتالىعىن باسقاردى.