الماتى قالالىق قوعامدىق كەڭەستىڭ ونلاين وتىرىسى بارىسىندا ۇلتتىق ساراپتاما ورتالىعىنىڭ ديرەكتورى ارنۇر نۇرتايەۆ تۇرعىنداردى ءوزىن-وزى ەمدەمەۋگە جانە ءدارىحاناعا بارماۋعا شاقىردى.

– مىسالى، دەنە قىزۋى ءسال عانا كوتەرىلگەن ادام دەرەۋ انتيبيوتيك ساتىپ الۋعا تىرىسادى. ءىس جۇزىندە، ۆيرۋستىق پنيەۆمونياعا انتيبيوتيك كومەكتەسپەيدى، ول ءتيىمسىز، ويتكەنى انتيبيوتيكتەر باكتەريالارعا اسەر ەتەدى، ءبىراق ۆيرۋستارعا ەمەس. باكتەرياعا قارسى پرەپاراتتاردى قابىلداۋ ارقىلى ءسىز يممۋنيتەتىڭىزدى السىرەتەسىز، – دەپ ءتۇسىندىردى ا.نۇرتايەۆ.

وتىرىس بارىسىندا، مەديسينا عىلىمدارىنىڭ كانديداتى رافايل قىپشاقبايەۆ ۆيرۋسقا قارسى پرەپاراتتاردى كوپ مولشەردە ساتىپ الماۋعا شاقىردى.

– ءدارىحانالارداعى باعانىڭ وسۋىنە ءوزىمىز كىنالىمىز. ونى ءوزىمىز قولدان جاسايمىز. ادامدار ءدارىحانالارعا بارىپ، ۆيرۋسقا قارسى دارى-دارمەكتەردى كوپتەپ ساتىپ الىپ جاتىر. ەسىڭىزدە بولسىن، COVID-19 ءدارىحانالارداعى دارىلەر كومەكتەسپەيدى. ولاردى ساتىپ الۋدىڭ قاجەتى جوق. الەمدە كوروناۆيرۋسقا قارسى قولداناتىن ءدارى ءالى تابىلعان جوق، – دەپ ءتۇسىندىردى دوسەنت.

ءوز كەزەگىندە "سك-فارماسيا" ج ش س باسقارما ءتوراعاسى بەرىك ءشارىپوۆ ءدارىحانالارداعى كەيبىر دارى-دارمەكتەردىڭ باعاسىنىڭ وسۋىنە بايلانىستى جاعدايدى ءتۇسىندىردى.

– جەكەمەنشىك ءدارىحانالاردا ۆيرۋسقا قارسى دارىلەر جوق دەگەن ساۋالدار تۋىنداپ جاتىر. ءبىز جەكەمەنشىك ءدارىحانالارعا جاۋاپ بەرمەيمىز. ولار ءوز بەتىنشە جۇمىس ىستەيدى. الايدا دەنساۋلىق ساقتاۋ مينيسترلىگىندە باعانى وسىرمەۋ تۋرالى بۇيرىق بار. مىسالى، بۇگىن باعاسى 10 تەڭگە بولعان ءدارىنى، ەرتەڭ 1000 تەڭگەدەن ساتۋعا بولمايدى. ءدارىحانالار ساتۋعا بولاتىن شەكتى باعادان اسپاۋى ءتيىس. ەگەر ءدارىحانا وسىنداي قادامدارعا بارسا، وندا ولار ەرەجەنى بۇزادى. تيىسىنشە، كەز كەلگەن ازامات زاڭسىز ارەكەتتەر تۋرالى شاعىمدانا الادى، – دەپ ءتۇسىندىردى ول.

دەرەككوز: قازاقپارات