قازاقستاندا كوروناۆيرۋس جۇقتىرعاندار سانى 41 مىڭنان اسقان تۇستا بيلىك ەلدە قايتاندان كارانتيندى كۇشەيتۋ تۋرالى ايتا باستادى.  جاڭادان تاعايىندالعان دەنساۋلىق ساقتاۋ ءمينيسترى الەكسەي سوي ىندەتپەن كۇرەسۋدىڭ 4 ءتاسىلىن ۇسىندى. ونىڭ سوزىنشە، كوروناۆيرۋسقا قارسى كۇرەسۋدىڭ  ەڭ ءتيىمدى ءتاسىلى: 4 اپتالىق قاتاڭ كارانتين رەجيمى.

ال ەكى ايعا جۋىق توتەنشە جاعداي رەجيمىندە، ءۇش ايعا جۋىق قاتاڭ كارانتيندە كۇن كورگەن حالىق مينيستر ۇسىنعان ءتاسىلدى قولداي ما؟ الماتىلىق تۇرعىنداردان سول تۋرالى سۇراپ كوردىك.

قازاقستان بيلىگى ەلدە كوروناۆيرۋسقا بايلانىستى 2 ايعا جۋىق سوزىلعان توتەنشە جاعداي رەجيمىن الىپ تاستاپ، قالالاردى قايتا اشقان سوڭ ۆيرۋس جۇقتىرعاندار سانى كۇرت كوبەيدى. ماۋسىم ايىنىڭ باسىنان بەرى ەلدە كۇنىنە 1000-نان استام ادامنان ۆيرۋس تابىلىپ ءجۇر. سوڭعى رەسمي اقپاراتقا سايكەس، ەلدە 41 055 ادامنان كوروناۆيرۋس تابىلعان. وسى ۋاقىتقا دەيىن ولاردىڭ 13558ء-ى اۋرۋىنان جازىلدى، ال 188ء-ى كوز جۇمدى.