وسى اپتادا قازاقستاننىڭ رەسەيگە قوسىلۋىن قولداپ، كەلمەسكە كەتكەن كەڭەس ءداۋىرىنىڭ مۇددەسىن قورعاپ جۇرگەن قازاقستاندىق بلوگەر  ەرمەك تايچيبەكوۆتى پسيحياتريكالىق اۋرۋحاناعا جاتقىزعاندىعى تۋرالى  «REGNUM اا» جازعان بولاتىن. بۇل تۋرالى «قامشى» پورتالى حابارلايدى.

جامبىل وبلىسى قورداي اۋداندىق سوت تەرگەۋشىسى الەۋمەتتىك جەلىلەر مەن ينتەرنەت-پورتالداردى پايدالانىپ، «قازاقستان رەسەيدىڭ گۋبەرنياسى بولۋ كەرەك» دەپ كوكىپ جۇرگەن ەرمەك تايشىبەكوۆتى (ءوزى تەگىن تايچيبەكوۆ دەپ كورسەتىپ ءجۇر) پسيحيكالىق اۋىتقۋلىققا دۋشار بولعان دەگەن تۇجىرىمعا كەلگەن. («كوميسسيا پريشلا ك ۆىۆودۋ، چتو يسپىتۋەمىي «وبنارۋجيۆاەت پريزناكي پارانوييالنوگو سيندروما س يدەيامي رەفورماتورستۆا ي ۆەليچيا، يمەيۋتسيا نارۋشەنيا ۆ سفەرە مىشلەنيا ۆ ۆيدە وبستوياتەلنوستي، سكلوننوستي ك «راسسۋجداتەلستۆۋ»، ا تاكجە يمەيۋتسيا نارۋشەنيا ۆ ەموسيونالنوي سفەرە ۆ ۆيدە تۋسكلوستي، مونوتوننوستي، وگرانيچەنيا كرۋگا ينتەرەسوۆ، نوزولوگيچەسكۋيۋ پرينادلەجنوست كوتورىح وپرەدەليت ۆ امبۋلاتورنىح ۋسلوۆياح نە پرەدستاۆلياەتسيا ۆوزموجنىم»).

سونىمەن قاتار، القابيلەر تەكسەرۋ ناتيجەلەرىن ەسكەرە كەلە، تايشىبەكوۆتى الماتى قالاسىنداعى ستاسيونارلى ەمدەۋ ورتالىعىنا جاتقىزۋ (جىندىحانا) تۋرالى شەشىمگە كەلگەن.

وسىعان دەيىن  مەملەكەتتىك قۇرىلىمعا قارسى شىعىپ، ق ر تاۋەلسىزدىگىنە اشىقتان اشىق سەنىمسىزدىك بىلدىرگەن – تايشىبەكوۆكە قاتىستى «ۇلتارالىق ارازدىقتى قوزدىرعانى ءۇشىن» قىلمىستىق ءىس قوزعالعان بولاتىن. 2015 جىلدىڭ 7-شىلدەسى كۇنى تايشىبەكوۆتىڭ ميىندا اۋىتقۋلار بولۋى مۇمكىن دەگەن كۇدىكپەن، وعان پسيحيكالىق جانە مەديسينالىق تەكسەرۋ جۇرگىزۋ جۇمىستارى باستالىپ كەتكەن.

ال 2014 جىلى ۋكرانينالىق ساياساتكەر يگور كولومايسكييدىڭ باسىن كەسىپ اكەلگەن ادامعا سىياقى تاعايىندايتىنىن ءوزىنىڭ فەيسبۋك الەۋمەتتىك جەلىسىندەگى پاراقشاسىندا مالىمدەگەن.

جاقىندا اتالمىش ينسيدەنتكە قاتىستى ءبىر توپ بەلسەندىلەر الەۋمەتتىك جەلىلەر مەن www.change.org سايتىندا ق ر پرەزيدەنتى نۇرسۇلتان ءابىش ۇلىنىڭ اتىنا پەتيسيا جولداۋ ءۇشىن قول جيناستىرىپ جاتقاندىعى ءمالىم بولدى. 

بەلسەندىلەردىڭ قالاۋى - تايشىبەكوۆتى پسيحياتريكالىق اۋرۋحانادان بوساتۋ. پەتيسيا اۆتورلارىنىڭ پىكىرىنشە، ەرمەك تايشىبەكوۆتىڭ ەش كىناسى جوق. ال ينتەرنەتتەگى پەتيسياعا 22 ادام داۋىس بەرگەن جانە ينتەرنەت قولدانۋشىلارى قازاقستانداعى زاڭ نورمالارىن ورىنداۋداعى باسسىزدىقتارعا جول بەرىلگەن دەگەن سىڭارجاق پىكىرلەرىن بىلدىرگەن. پىكىرلەر رەسەيدىڭ ماسكەۋ،  بارناۋل قالالارىمەن قاتار، مالايزيا جانە قازاقستاننان دا جازبالار قالدىرىلعان. پىكىرشىلەر پايىمىنىڭ ءبىرسىپىراسى؛ «قازاقستانداعى بەيبەرەكەتسىزدىككە نازار اۋدارىڭىزدار!»، «تايشىبەكوۆ زاڭعا قارسى كەلەتىن ەشنارسە ىستەگەن جوق»، «قازاقستان بيلىگىنە  «پوزور!»»، «ءبىزدى سسر-دەن ايىرعان ەركىندىك قايدا؟ كەڭەستىك كەزدە ءبىز جاقسى ءومىر سۇرگەن ەدىك!»  ت.ب.

اڭگىمەنىڭ اۋانى تايشىبەكوۆتىڭ تاۋەلسىزدىككە كەلتىرگەن ءقاۋىپتى مالىمدەمەلەرى بولعان سوڭ، ق ر اتا زاڭىندا كورسەتىلگەن بىرنەشە باپتى مىسالعا كەلتىرگەندى ءجون كوردىك. قازاقستان رەسپۋبليكاسى كونستيتۋسياسىنىڭ 20-بابىنىڭ 3ء-شى تارماعىندا: «رەسپۋبليكانىڭ كونستيتۋسيالىق قۇرىلىسىن كۇشتەپ وزگەرتۋدى، ونىڭ تۇتاستىعىن بۇزۋدى، مەملەكەت قاۋىپسىزدىگىنە نۇقسان كەلتىرۋدى، سوعىستى، الەۋمەتتىك، ناسىلدىك، ۇلتتىق، ءدىني، تەكتىك-توپتىق جانە رۋلىق استامشىلىقتى، سونداي-اق قاتىگەزدىك پەن زورلىق-زومبىلىققا باس ۇرۋدى ناسيحاتتاۋعا نەمەسە ۇگىتتەۋگە جول بەرىلمەيدى» دەپ ايقىن جازىلعان.

سونىمەن قاتار، ق ر قىلمىستىق كودەكسىنىڭ 170 بابى 1 تارماعى بويىنشا «وكiمەتتi كۇشتەپ باسىپ الۋعا، وكiمەتتi كۇشتەپ ۇستاۋعا، مەملەكەت قاۋiپسiزدiگiنە نۇقسان كەلتiرۋگە نەمەسە كونستيتۋسيالىق قۇرىلىسىن كۇشتەپ وزگەرتۋگە، سونداي-اق قازاقستان رەسپۋبليكاسىنىڭ تۇتاستىعىن جانە ونىڭ اۋماعىنىڭ بiرلiگiن كۇشتەپ بۇزۋعا جاريا تۇردە ۇندەۋ، سونداي-اق وسىنداي مازمۇنداعى ماتەريالداردى وسى ماقساتتا تاراتۋ ءۇش جۇزدەن بiر مىڭ ايلىق ەسەپتiك كورسەتكiشكە دەيiنگi مولشەردە ايىپپۇل سالۋعا، نە بەس جىلعا دەيiنگi مەرزiمگە باس بوستاندىعىنان ايىرۋعا جازالانادى» دەپ كورسەتىلگەن. ال 2 تارماقتا «بۇقارالىق اقپارات قۇرالدارىن پايدالانىپ جاسالعان نەمەسە ۇيىمداسقان توپ جاساعان ناق سول ارەكەتتەر بiر مىڭنان بەس مىڭ ايلىق ەسەپتiك كورسەتكiشكە دەيiنگi مولشەردە ايىپپۇل سالۋعا، نە ءۇش جىلدان جەتى جىلعا دەيiنگi مەرزiمگە باس بوستاندىعىنان ايىرۋعا جازالانادى» دەپ جازىلعان.

ەسكىنى كوكسەپ، ەلدىڭ ەسىن ەسىرتكىشە ۋالاعان ەرمەك تايشىبەكوۆ تۋرالى قازاقستاندىق ب ا ق از جازىپ جۇرگەن جوق.  ءوزىن تارازدىڭ تۋماسىمىن دەپ تانىستىرىپ جۇرگەن تايشىبەكوۆتى تەمىر تورعا توعىتۋعا ايعاقتار جەتەرلىك بولسا دا، ەل تاۋەلسىزدىگىن تارك ەتكىسى كەلەتىن ازاماتتىڭ ايىلىن جيعىزاتىن ۋاقىت الدەقاشان جەتكەن ەدى. رەسەيدەگى جيرينوۆسكيي، ۋكرايناداعى ولەگ لياشكو سەكىلدىلەردىڭ سارقىنشاعى بىزدەن دە تابىلعانى وكىنىشتى بولسا دا شىندىق.  ازىرگە قۇزىرلى قۇقىق قورعاۋ ورگاندارى تايشىبەكوۆتى ءتاۋباسىنا كەلتىرۋ ءۇشىن پسيحيكالىق اۋىتقۋعا ۇشىراعاندار جاتاتىن ورىنعا جىبەرگەن ەكەن. ەندى ءىستىڭ ناتيجەسىن كۇتۋ عانا قالعان سەكىلدى بىزگە. ال پەتيسيا جازىپ، قول جيناۋشىلار ءوز جۇمىستارىن ەش كەدەرگىسىز جالعاستىرۋدا.

نۇرگەلدى ءابدىعاني ۇلى