الەمدە اشتىقتان زارداپ شەككەندەردىڭ سانى ءوسىپ جاتىر. بۇل تۋرالى بۇۇ بالالار قورى (يۋنيسەف) جاريالاعان باياندامادا ايتىلعان.

2019 جىلى الەمدە 690 ملن ادام اشتىقتان جاپا شەككەن. بۇل ءبىر جىل بۇرىنعى كورسەتكىشتەن 10 ملن، 5 جىل بۇرىنعى كورسەتكىشتەن 60 ملن ادامعا كوپ.

سونداي-اق 2019 جىلى 2 ملرد ادام تاماق جەتىسپەۋشىلىگىنەن زارداپ شەككەن.

ماماندار كوروناۆيرۋس پاندەمياسى جاعدايدى ۋشىقتىرا تۇسكەنىن ايتتى. ولاردىڭ سوزىنشە، پاندەميا كەسىرىنەن پايدا بولعان جاھاندىق داعدارىس تەك وندىرىسكە عانا ەمەس، ازىق-تۇلىكتى تۇتىنۋعا دا اسەر ەتكەن.

– كوروناۆيرۋس پاندەمياسىنىڭ دەنساۋلىق ساقتاۋ، الەۋمەتتىك جانە ەكونوميكالىق سالالارعا كەرى اسەرى كوپ. بۇل تۇتىنۋشىلىق قاۋىپسىزدىككە جانە حالىقتىڭ وسال توپتارىنا قيىنعا سوعادى، – دەيدى بۇۇ وكىلدەرى.

ەگەر قازىرگى ءۇردىس جالعاساتىن بولسا، وندا 2030 جىلى الەمدە 840 ملن ادام اشتىقتان زارداپ شەگۋى مۇمكىن. بۇل جاعدايدا اسىرەسە بالالار قاتتى زارداپ شەگىپ جاتىر.

بايانداما اۆتورلارىنىڭ مالىمەتىنشە، 2019 جىلى الەمدە 5 جاسقا دەيىنگى ءاربىر بەسىنشى بالادا (21%) دۇرىس تاماقتانباۋ سالدارىنان دامۋىندا اۋىتقۋ بايقالعان.

بۇۇ-نىڭ باعالاۋى بويىنشا، اشتىقتان زارداپ شەگەتىن ادامداردىڭ كوپشىلىگى – 381 ملن ادام ازيادا تۇرادى. افريكادا 250 ملن ادام، لاتىن امەريكاسىندا جانە كاريب ايماعىندا 48 ملن ادام قيىن جاعدايدا.