ىشكى ىستەر ءمينيسترى ەرلان تۇرعىمبايەۆ پرەزيدەنت قاسىم-جومارت توقايەۆقا دارى-دارمەكتى زاڭسىز ساتۋدىڭ جولىن كەسۋ جانە كارانتين شارالارىن بۇزۋ فاكتىلەرى تۋرالى باياندادى. بۇل تۋرالى اقوردا حابارلادى.

توقايەۆ كوروناۆيرۋس ىندەتىنىڭ تارالۋىنا قارسى كۇرەس ماسەلەلەرى جونىندە وتكەن سەلەكتورلىق كەڭەستە قۇقىق قورعاۋ، دەنساۋلىق ساقتاۋ جانە جەرگىلىكتى اتقارۋشى ورگاندار دارىلىك زاتتار مەن مەديسينالىق قۇرال-جابدىقتاردى ساتۋ بويىنشا قۇقىق بۇزۋشىلىقتاردى انىقتاۋدا جانە ونىڭ جولىن كەسۋدە تۇراقتى تۇردە ۆەدومستۆوارالىق جۇمىس جۇرگىزۋ قاجەتتىگىن باسا ايتتى.

كەڭەستە ىشكى ىستەر ءمينيسترى ە.تۇرعىمبايەۆ ەسەپ بەرىپ، ءىىم دەنساۋلىق ساقتاۋ جانە جەرگىلىكتى اتقارۋشى ورگاندارمەن بىرلەسىپ، 18 مىڭنان استام رەيد جۇرگىزگەنى تۋرالى باياندادى.

كورسەتىلگەن كەزەڭدە بارلىعى 4000-نان استام كارانتيندى بۇزۋشىلار انىقتالىپ، شارا قولدانىلدى. اتاپ ايتقاندا مۇنداي جاعداي الماتى قالاسىندا، اقمولا، تۇركىستان، الماتى جانە جامبىل وبلىستارىندا كوپ تىركەلدى.

دارىلىك زاتتار مەن مەديسينالىق ماقساتتاعى بۇيىمداردى زاڭسىز ساتۋدىڭ جولىن كەسۋ بويىنشا (5 شىلدەدەن باستاپ) ىشكى ىستەر ورگاندارى زاڭسىز اينالىمنان 65 مىڭنان اcتام قوراپ دارىلىك پرەپاراتتاردى، جارتى ميلليون مەديسينالىق ماسكا مەن 36 مىڭ مەديسينالىق بۇيىمدى تاركىلەگەن. ولار قىمبات باعادا ساتىلعان.

سونداي-اق ىشكى ىستەر ورگاندارى دارىلىك زاتتاردى زاڭسىز ساتۋدىڭ 348 فاكتىسىنىڭ جولىن كەستى. پوليسياعا 284 ادام جەتكىزىلدى، ونىڭ 138ء-سى مەديسينا سالاسىنىڭ قىزمەتكەرلەرى. دارى-دارمەكتىڭ كوپ كولەمى نۇر-سۇلتان، الماتى، شىمكەنت، قاراعاندى جانە اتىراۋ قالالارىندا الىندى.

الىنعان مەديسينالىق پرەپاراتتار اۋماقتىق دەنساۋلىق ساقتاۋ ورگاندارىنا بەرىلەدى.

ە.تۇرعىمبايەۆ ىشكى ىستەر ورگاندارى جۇرگىزىپ جاتقان قوعامدىق ءتارتىپتى ساقتاۋ جانە قولدانىستاعى شەكتەۋ شارالارىن قامتاماسىز ەتۋ جۇمىستارى تۋرالى باياندادى. بۇل مىندەتتەردى ورىنداۋ ءۇشىن كۇندەلىكتى 13 000 پوليسەي، ۇلتتىق ۇلاننىڭ اسكەري قىزمەتشىلەرى جانە 1000 ەرىكتى  جۇمىس ىستەۋدە. 4 وبلىستا 2 سانيتاريالىق جانە 9 بلوكبەكەت قويىلدى. 241 جۇقتىرۋ وشاعى مەن 366 كارانتيندىك نىسان قورشاۋعا الىندى.

كەڭەس قورىتىندىسى بويىنشا، پرەزيدەنت ىشكى ىستەر ورگاندارى بۇل باعىتتاعى جۇمىستى جالعاستىراتىنىن، ال، كىنالىلەر زاڭناماعا سايكەس جازالاناتىنىن  اتاپ ءوتتى.

بۇل تاپسىرمانىڭ ىسكە اسىرىلۋىن باقىلاۋ ق ر پرەزيدەنتى اكىمشىلىگىنىڭ ۇيلەستىرۋمەن قاۋىپسىزدىك كەڭەسىنىڭ اپپاراتىنا جۇكتەلدى.