الماتى قالاسىندا باعدارشامنىڭ قىزىل تۇسىنە توقتاعان كولىكتەردىڭ فاراسىن ءسۇرتىپ، ءناپاقا تاباتىن جاسوسپىرىمدەر بار. وسى ىسپەن اينالىساتىن ءۇش بالانى اڭگىمەگە تارتۋعا تىرىسقانىمىزدا باسىندا سويلەسۋگە نيەت بىلدىرمەدى. جۇمىستارى تۋرالى بايانداپ بەرسە، ءارقايسىسىنا 500 تەڭگە بەرگىمىز كەلەتىنىن ايتقاندا عانا كەلىسىپ، وزدەرىنە 500 ەمەس، 400 تەڭگە دە جەتەتىنىن جەتكىزىپ، "كاسىپتەرى" تۋرالى كوسىلە سويلەي باستادى.
13 جاستاعى ماكسيم، يان، يسماد ەسىمدى ءۇش بالا قالاداعى اباي داڭعىلىنىڭ روزىباكييەۆ پەن گاگارين كوشەلەرىمەن قيىلىساتىن جەرىندە كولىك فاراسىن ءسۇرتىپ اقشا تاۋىپ جۇرگەنىنە بىرنەشە اي بولدى. ولار بۇل جۇمىستى وزدەرى سەكىلدى بالالاردىڭ ينتەرنەتتەگى ۆيدەوسىن كورگەننەن كەيىن ىستەي باستاعان.
ولاردىڭ ايتۋىنشا، اتا-انالارى بۇل كاسىپپەن اينالىسقاندارىنا قارسى بولماعان.
جەتىنشى جانە سەگىزىنشى سىنىپ وقۋشىلارى وزدەرى تاپقان اقشانى ۆەلوسيپەد، جاڭا سمارتفون، ساموكات الۋ ءۇشىن جيناپ جاتقاندارىن ايتتى.
باسىندا قانشا اقشا تاباتىنىن ايتقىسى كەلمەگەن بالالار اڭگىمە بارىسىندا تابىستارىنىڭ جاقسى ەكەنىن جاسىرمادى.
بالالاردىڭ سوزىنشە، ءبىر كۇندە يسمەد ەڭ كوبى 10 مىڭ تەڭگە، يان 15 مىڭ تەڭگە، ماكسيم 26 مىڭ تەڭگە پايداعا كەنەلگەن. ءبىر كۇندىك ەڭ تومەنگى تابىستارى – 5 مىڭ تەڭگە. "دەمالىس كۇندەرى اقشا از تابامىز. ونىڭ بارلىعى ادامداردىڭ كوڭىل-كۇيىنە بايلانىستى" دەيدى وزدەرى.
كىشكەنتاي كاسىپكەرلەر تۇسكى استى ۋاقىت جوعالتپاۋ ءۇشىن جاقىن جەردەگى كافەلەردەن ىشەدى نەمەسە فاستفۋد ساتاتىن دۇڭگىرشەكتەردەن دونەر، بۋرگەر الىپ جەيدى.
تاڭنان كەشكە دەيىن كوشەدە جۇرەتىن بالالار كەلەسى جىلى دا جۇمىس ىستەگىسى كەلەدى. قازىرگى تاڭدا بۇكىل الماتى بويىنشا ولارعا باقتالاس بولىپ جۇرگەن 20 شاقتى بالا بار ەكەن. ءبىراق ءبىر كاسىپپەن اينالىسىپ جۇرگەندىكتەن قارىم-قاتىناستارى جاقسى.
كامەلەت جاسقا تولماعاندارى ءۇشىن كوپ جاعدايدا پوليسيا قىزمەتكەرلەرى جۇمىس ىستەۋگە رۇقسات بەرمەي، قايتارىپ جىبەرەدى. ال كەيبىر پوليسەيلەر بوقتاپ، ايقايلاپ وزدەرىمەن بىرگە الىپ كەتەدى ەكەن.
"كوشەدە قايىر تىلەپ جۇرگەننەن گورى جۇمىس ىستەگەن جاقسى" دەپ سانايتىن بالالار جاعدايى جوق ادامداردى كورگەندە قولدان كەلگەنشە كومەكتەسىپ تۇرادى ەكەن. 13 جاسىنان باستاپ كاسىپپەن اينالىسىپ جۇرگەن وقۋشىلاردىڭ بولاشاققا قۇرعان جوسپارلارى دا بار. ەر جەتكەن سوڭ ماكسيم – اسپاز، يسمەد – اۆتومەحانيك، ال يان ءوزىنىڭ كلينيكاسىن اشىپ، ءتىس دارىگەرى بولعىسى كەلەدى.
پىكىر قالدىرۋ