اقش قىتايعا جۇمادا تەحاس شتاتىنداعى حيۋستونداعى كونسۋلدىعىن جابۋدى بۇيىردى. بۇل تۋرالى BBC حابارلادى.

اقش مەملەكەتتىك دەپارتامەنتى بۇل شەشىم "امەريكالىق زياتكەرلىك مەنشىكتى قورعاۋ ماقساتىندا" قابىلدانعانىن ايتتى.

ءبىراق جۇڭگو ءسىم-نىڭ وكىلى ۆان ۆەنبين بۇل "اشۋلى جانە نەگىزسىز" دەپ مالىمدەدى.

بۇل مالىمدەمە بەلگىسىز بىرەۋلەر عيمارات اۋلاسىنداعى قوقىس جاشىگىنە قاعاز جاعىپ جاتقاننان كەيىن پايدا بولدى.

الەۋمەتتىك جەلىلەردە حيۋستونداعى كونسۋلدىقتىڭ اۋلاسىندا ادامدار باراباندارعا قاعاز جاعىپ جاتقانى تۋرالى بەينەروليكتەر تارادى.

KPRC2 تەلەكانالىنىڭ حابارلاۋىنشا، جەرگىلىكتى تۇرعىنداردىڭ قوڭىراۋلارىنان كەيىن وقيعا ورنىنا جەدەل قىزمەتتەر كەلگەن، ءبىراق عيماراتقا كىرە الماعان.

حيۋستونداعى جۇڭگو كونسۋلدىعىنا جاقىن ماڭداعى عيماراتتارداعى كۋاگەرلەردىڭ ايتۋىنشا، ادامدار قوقىس قاعازداردى ورتەپ جاتقان.

حيۋستون ءورت ءسوندىرۋ ءبولىمىنىڭ باستىعى سەميۋەل پەنان ABC تەلەارناسىنا: "جۇڭگو كونسۋلدىق مەكەمەسىنىڭ اۋلاسىنداعى كونتەينەردە اشىق تۇردە بىردەڭە ورتەپ جاتقان سياقتى... ءبىراق بىزگە كىرۋگە رۇقسات بەرمەدى... ءبىز باقىلاپ وتىرامىز" دەگەن.

كەيبىر باق-تار اتى اتالماعان شەنەۋنىكتىڭ سوزىنە سۇيەنىپ، "كونسۋلدىق قىزمەتكەرلەرى جۇما كۇنى جەرگىلىكتى ۋاقىت بويىنشا ساعات 16-دا عيماراتتان شىعارىلادى" دەپ مالىمدەگەن.

حيۋستونداعى كونسۋلدىق 1979 جىلى اشىلعان جانە جۇڭگو قوعامداستىعى كوپ جەردە ورنالاسقان. 

وكىلدىك تەحاس، وكلاحوما، لۋيزيانا، اركانزاس، ميسسيسيپي، الاباما، دجوردجيا، فلوريدا جانە پۋەرتو-ريكو سەكىلدى سەگىز شتاتتىڭ كونسۋلدىق ماسەلەلەرىن شەشەدى.

ءبىراز ۋاقىتتان بەرى اقش پەن جۇڭگو اراسىندا شيەلەنىس كۇشەيە ءتۇستى. پرەزيدەنت دونالد ترامپتىڭ اكىمشىلىگى بەيجىڭدى ساۋدا جانە كوروناۆيرۋستىق پاندەمياعا قاتىستى بىرنەشە رەت ايىپتاعان، سونداي-اق جۇڭگو گونكونگقا قاۋىپسىزدىك تۋرالى داۋلى جاڭا زاڭ قابىلدادى.

سودان كەيىن سەيسەنبىدە اقش ادىلەت مينيسترلىگى قىتايدى "كوۆيد-19 ۆاكسينالارىن جاسايتىن زەرتحانالارعا باعىتتالعان حاكەرلەرگە دەمەۋشىلىك جاسادى" دەپ ايىپتاپ، اقش زەرتتەۋ كومپانيالارىنا تىڭشىلىق جاساعان جانە باسقا ۇرلىق ءۇشىن مەملەكەتتىك اگەنتتەردەن كومەك العان ەكى جۇڭگو ازاماتىن ايىپتادى.

وعان قوسا، ترامپ قىتايدىڭ شىڭجاڭ پروۆينسياسىنداعى ەتنيكالىق قازاقتار مەن ۇيعىرلاردىڭ قىسىمعا ۇشىراۋىنا قاتىسى بار 50-گە جۋىق قىتايلىق كومپانياعا سانكسيا سالدى.