ساتپايەۆ قالاسىندا ۇرلانعان 5 جاسار قىزدىڭ اتا-اناسى الەۋمەتتىك جەلىدە جەزقازعان مەن ساتپايەۆ قالالارىنىڭ تۇرعىندارىنا ۇندەۋ جاسادى.
– ءبىرىنشى كەزەكتە ءبىز – سۇلەيمەن وتباسى، اتاپ ايتقاندا اتا-اناسى وتەۋباي-مانارا ءوز اتىمىزدان قالانىڭ جۇرتشىلىعى مەن ەرىكتىلەرگە قىزىمىزدى ىزدەستىرۋگە اتسالىسىپ، ۇلەس قوسقاندارى ءۇشىن العىس بىلدىرەمىز! ايسەزىمنىڭ تابىلۋىنا سىزدەردىڭ سەپتىكتەرىڭىز ءتيدى. ايسەزىمگە جانە ونىڭ وتباسىنا ءبىلدىرىپ جاتقان جىلى لەبىزدەرىڭىز بەن قولداۋلارىڭىزعا راقمەت ايتامىز. قازىرگى كۇنى قىزىمىزدىڭ جاعدايى ماماندار تاراپىنان جاقسى دەپ باعالانۋدا. بىزبەن پسيحولوگتار مەن ارنايى دارىگەرلەر كۇندەلىكتى بايلانىستا وتىر. سونداي-اق ءبىز ق ر بالا قۇقىعى جونىندەگى ۋاكىل ارۋجان ساينمەن دە تىعىز بايلانىستامىز. ول ءوز تاراپىنان قاجەتتى ماماندار مەن رەابيليتاسيالىق ەمحانالاردى تابۋعا، سونداي-اق ادۆوكات پەن قۇقىقتىق قورعاۋدى ۇيىمداستىرۋعا كومەگىن تيگىزىپ جاتىر، – دەپ جازىلعان ۇندەۋدە.
قىزدىڭ اتا-اناسىنىڭ ايتۋىنشا، وتباسىنىڭ قارجىلاي كومەككە مۇقتاجدىعى جوق، بارلىق پسيحولوگيالىق جانە قارجىلاي شىعىندى "قازاقمىس" وتەۋگە ۋادە بەرگەن.
– ەرەكشە العىسىمىزدى "قازاقمىس كورپوراسياسى" جشس-ىنە بىلدىرەمىز. كومپانيا باسشىلىعى ايسەزىمدى رەابيليتاسيادان وتكىزۋگە جۇمسالاتىن شىعىنداردىڭ ءبارىن وتەۋگە شەشىم قابىلدادى. سوندىقتان قارجىلاي كومەككە مۇقتاجدىعىمىز جوق، – دەيدى ولار.
سونداي-اق ولار، جالعان اقپارات تاراتپاۋدى سۇرادى.
– تاعى ءبىر ايتارىمىز: قىزىمىزدىڭ سۋرەتىن الەۋمەتتىك جەلىلەر مەن مەسسەندجەرلەردە تاراتۋدى، وقيعاعا قاتىستى ءتۇرلى پىكىرلەر مەن جالعان اقپاراتتاردى تاراتۋدى دوعارۋلارىڭىزدى سۇرايمىز. ءبىز بولعان وقيعانى تەزىرەك ۇمىتقىمىز كەلەدى. ۇلكەن ءوتىنىش: قارجىلاي قور ۇيىمداستىرۋدى، ءتۇرلى جيىن وتكىزۋدى توقتاتىڭىزدارشى! ءبىزدىڭ باسىمىزعا تۇسكەن قايعى باسقا كەلەڭسىز وقيعالاردىڭ سەبەبى بولۋىن قالامايمىز. مۇنىڭ ءبارى ءبىزدىڭ وتباسى ءۇشىن اۋىر سوققى ءارى سول قايعىلى كۇندى ويىمىزعا سالا بەرەدى، – دەدى ايسەزىمنىڭ اتا-اناسى.
پىكىر قالدىرۋ