فۋتبول مامانى حاليمجان ەرجانوۆ 57 جاسىنا قاراعان شاعىندا ومىردەن ءوتتى. بۇل تۋرالى "توبىل" فۋتبول كلۋبىنىڭ باسپا ءسوز قىزمەتى حابارلادى.
"توقسانىنشى جىلداردىڭ سوڭىندا حاليمجان ساعيدوللا ۇلى "توبىلدىڭ" ەل چەمپيوناتىنا قايتا ورالۋى ءۇشىن ۇلكەن جۇمىس اتقاردى. راس، ءبىزدىڭ كوماندانىڭ كوپتەگەن تابىستارى وسى كىسىنىڭ ەسىمىمەن تىعىز بايلانىستى، ونىڭ ىشىندە بىرىنشىلىكتىڭ جالعىز التىنى بار. سوڭعى جىلدارى حاليمجان ەرجانوۆ "ورتالىق" ستاديونىندا لاۋازىمدى قىزمەتتەر اتقاردى" دەلىنگەن حابارلامادا.
حاليمجان ەرجانوۆ كوپتەگەن جىل بويى "توبىل" كلۋبىنىڭ باسشىلىعىندا جۇمىس ىستەدى – باس ديرەكتور، ديرەكتور جانە كلۋب پرەزيدەنتى قىزمەتىن اتقاردى. سونداي-اق ول پاۆلودارلىق "ەرتىس" پەن "استاناداعى" جۇمىسىمەن دە تانىمال. ودان بولەك، ەرجانوۆ ۇلتتىق فۋتبول ليگاسىنىڭ جەتەكشىسى بولعان.
پىكىر قالدىرۋ