بۇگىن وڭىرلىك كوممۋنيكاسيالار الاڭىندا الماتى قالاسىنىڭ المالى اۋدانى اكىمى بەكقالي تورعايەۆ، الماتى قالاسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنىڭ باسشىسى ساۋلە نۇرعالييەۆا جانە الماتى قالاسى المالى اۋدانىنىڭ جەرگىلىكتى پوليسيا قىزمەتىنىڭ باستىعى رۇستەم ابدىعالييەۆتىڭ قاتىسۋىمەن ونلاين-بريفينگ ءوتتى.

سپيكەرلەر كوروناۆيرۋس ينفەكسياسىن جۇقتىرماۋدىڭ پروفيلاكتيكالىق قۇرالدارىنىڭ ءبىرى ماسكا تاعۋ رەجيمىن ۇستانۋ ەكەندىگىن تاعى ءبىر ەسكەرتىپ ءوتىپ، ءبىرقاتار كەڭەستەر دە بەرە كەتتى.

«قولدانىلىپ جاتقان شارالار جۇقتىرۋ تىزبەگىن ۇزۋگە مۇمكىندىك بەرەدى. ماسكا دەگەنىمىز پاندەميانى جەڭىپ شىعۋداعى ۇلكەن ءبىر قۇرال»، — دەپ ايتتى بەكقالي تورعايەۆ.

ول سونىمەن قاتار الەۋمەتتىك اراقاشىقتىقتى ساقتاۋ ەرەجەلەرىن دە ۇستانۋعا، مۇمكىندىگىنشە ادام كوپ جينالاتىن جەرلەرگە بارۋدى قويا تۇرۋعا شاقىردى.

سونىمەن بىرگە ساۋلە نۇرعالييەۆا تۇرعىنداردىڭ ءبارى بىردەي ماسكانى دۇرىس تاقپايتىنىنا كوڭىل اۋداردى. بۇل رەتتە اۋا تامشىلارى ارقىلى بەرىلەتىن ينفەكسيا ءۇشىن نەگىزگى كىرىس قاقپاسى مۇرىن ەكەنىن ايتا كەتكەن ءجون. سول سەبەپتى تەك اۋىزعا تاعىلعان ماسكا COVID-19- عا قارسى كۇرەستە ءتيىمسىز بولىپ تابىلادى. وسىعان بايلانىستى، ماسكانى دۇرىس تاعۋ رەجيمىن ۇستانعان ءجون.

«حالىق ماسكانى يەك استىندا تاعۋ نەمەسە مۇرىننىڭ اشىق تۇرۋى ول م اسكانى تاعۋ بولىپ سانالمايتىنىن تۇسىنۋلەرى كەرەك. ماسكا اۋىز بەن مۇرىندى تولىعىمەن جاۋىپ، تولىعىمەن بەتكە ءتيىپ تۇرۋى كەرەك»، — دەپ ءتۇسىندىرىپ وتكەن ساۋلە نۇرعالييەۆا جابىق عيماراتتا ماسكانى وسىلاي تاعۋ دا اكىمشىلىك بۇزۋشىلىق بولىپ تابىلاتىنىن اتاپ ءوتتى.

كوروناۆيرۋس ينفەكسياسىنىڭ تاراۋىن بولدىرماۋ ماقساتىندا شوب نىساندارىنىڭ اۋماعىندا سانيتارلىق تالاپتاردىڭ ساقتالۋىن قاداعالاۋ بويىنشا مونيتورينگتىك توپتاردىڭ جۇمىسى جالعاسۋدا. بۇگىنگى تاڭدا كاسىپورىندار قىزمەتكەرلەرىنىڭ اراسىندا ماسكا رەجيمىن ساقتاماۋدىڭ 17 فاكتىسى انىقتالدى.

«ءبىز كاسىپكەر تاراپىنان ماسكا اۋىستىرۋ رەجيمىن قامتاماسىز ەتۋدە جەتكىلىكتى مولشەردە ماسكا بەرىلگەنمەن، جەكە تۇلعالار – ساتۋشىلار، تۋروپەراتورلار، مەنەدجەرلەردىڭ ولاردى كيمەي، ءتارتىپ بۇزۋدىڭ 17 فاكتىسىن انىقتادىق»، — دەدى ساۋلە نۇرعالييەۆا.

مونيتورينگتىك توپتاردىڭ جۇمىسى كاسىپكەرلىك نىساندارىنىڭ اۋماعىندا تۇرعىنداردىڭ جۇقتىرۋ ءقاۋپىن تومەندەتۋ ءۇشىن قاجەت. سونىمەن بىرگە، تۇرعىنداردان كەلىپ تۇسكەن وتىنىشتەر بويىنشا جەدەل جەلى قىزمەت ەتەدى.

«بۇگىنگى تاڭدا شامامەن 25 قوڭىراۋ كەلىپ تۇسكەن. ءتارتىپ بۇزۋ فاكتىلەر انىقتالعان جاعدايدا ناقتى مەكەن-جايدى ۆاتساپقا جولداپ، نىسانعا قاتىستى قانداي شاعىم بار ەكەنىن ايتۋلارىڭىزدى سۇرايمىز»، — دەپ اتاپ ءوتتى ساۋلە نۇرعالييەۆا.

بۇدان ارى مونيتورينگتىك توپ شاعىم تۇسكەن جەرگە بارادى. بۇگىنگى تاڭدا كەلىپ تۇسكەن 25 شاعىمنىڭ 10-ى بويىنشا كارانتين رەجيمىنىڭ بۇزىلۋ جاعدايلارى راستالدى.