الماتىدا كارانتين كەزەڭىندە توي وتكىزگەنى ءۇشىن مەكەمە جۇمىسى ءبىر جارىم ايعا توقتاتىلدى. بۇل تۋرالى وڭىرلىك كوممۋنيكاسيالار قىزمەتىندە وتكەن ونلاين-بريفينگ بارىسىندا الماتى قالاسى تۇركسىب اۋدانى اكىمىنىڭ ورىنباسارى ەرمەك بەيسەۋوۆ ايتتى.

اۋداندا كوروناۆيرۋستىق ينفەكسيانىڭ الدىن الۋ جانە بولدىرماۋ ماقساتىندا قاتاڭ شەكتەۋ شارالارى قولعا الىنعان. شەكتەۋ شارالارىن، بەتپەردە رەجيمىن جانە الەۋمەتتىك قاشىقتىق ساقتاۋ بويىنشا كەڭ اۋقىمدى ءتۇسىندىرۋ جۇمىستارى جۇرگىزىلۋدە. ءتۇسىندىرۋ جۇمىستارىنا اقپاراتتىق تاقتايشالاردى ورنالاستىرۋ، اۋدان اكىمدىگى وكىلدەرىنىڭ، اۋداندىق سەس، اۋداندىق پوليسيا باسقارماسى قىزمەتكەرلەرىنىڭ جانە ۆولونتەرلار شتابىنىڭ قاتىسۋىمەن مونيتورينگتىك-تۇسىندىرۋ توپتارىنىڭ قىزمەت ەتۋى كىرەدى.

تەك 5 شىلدەدەن باستاپ 646 وبەكت تەكسەرىلدى، ونىڭ ىشىندە 131 نىساننان سانيتارلىق نورمالاردىڭ بۇزىلۋى جانە جۇمىس رەجيمىن شەكتەۋ شارالارى انىقتالدى. نىساندارعا قاتىستى اكىمشىلىك حاتتامالار تولتىرىلدى.
«نىسانداردى باقىلاۋ بويىنشا شارالار كۇن سايىن جۇرگىزىلەدى. قازىرگى ۋاقىتتا 131 نىسان ءتارتىپ بۇزۋشىلىقتار تولىق جويىلعانشا ءوز قىزمەتتەرىن توقتاتتى. مونيتورينگ توپتار تەكسەرگەننەن كەيىن عانا بۇل نىساندار جۇمىستارىن قالپىنا كەلتىرە الادى »، — دەدى ە. بەيسەۋوۆ.

سونىمەن بىرگە،مونيتورينگتىك توپتىڭ تۇركسىب اۋدانىنداعى سوتقا بەرگەن ءوتىنىشى بويىنشا Dostluk مەيرامحاناسىنىڭ قىزمەتى توقتاتىلدى، وندا كارانتين رەجيمى كەزىندە 100 ادامعا ارنالعان بانكەت وتكىزىلدى.

الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ قاۋلىسىنا سايكەس جەكە كاسىپكەرگە 277 800 تگ كولەمىندە مەملەكەت كىرىسىنە ايىپپۇل سالىندى جانە قىزمەتى 1،5 ايعا (45 كۇنگە) توقتاتىلدى.

سونداي-اق، اۋداندا 11 جاياۋ پوليسيا توپتارى ۇيىمداستىرىلىپ، ۋچاسكەلىك كولىكتەر پاترۋلدەۋگە جانە اۋلالار مەن حالىق كوپ جينالاتىن جەرلەردە ءتۇسىندىرۋ جۇمىستارىن جۇرگىزۋگە پايدالانىلدى. بۇگىنگى تاڭدا جەكە تۇلعالارعا بەتپەردە رەجيمىن ساقتاماعانى ءۇشىن 25 اكىمشىلىك حاتتاما تولتىرىلدى. بۇعان قوسىمشا، اۋداندىق پروكۋراتۋرامەن بىرگە ءدارىحانالارداعى دارى-دارىمەكتەردىڭ باعاسىن باقىلاۋ ءۇشىن 2 توپ جۇمىس جاساۋدا.