بوستاندىق اۋدانىندا جەكە تۇلعالارعا قاتىستى 76 حاتتاما تولتىرىلدى: ايىپپۇل ەنگىزىلگەننەن كەيىن كارانتين ءتارتىبىن بۇزۋ جاعدايلارىنىڭ ازايعانى بايقالادى. كارانتين رەجيمىن ساقتاۋدى باقىلاۋ بويىنشا قانداي جۇمىستار جۇرگىزىلىپ جاتقانىن وڭىرلىك كوممۋنيكاسيالار قىزمەتىنىڭ الاڭىندا وتكەن ونلاين-بريفينگ بارىسىندا بوستاندىق اۋدانى اكىمىنىڭ ورىنباسارى سەرىك ادىلبايەۆ ايتتى.

بوستاندىق اۋدانىندا ىشىندەگى ازىق-تۇلىك سۋپەرماركەتتەرىن، ءدارىحانالاردى جانە جازعى تەراسسالارى بار ستاسيونارلى تاماقتانۋ نىساندارىن قوسپاعاندا، 3 سو، 6 سوسو، 1 بازار، 59 فيتنەس-ورتالىق جانە ترەناجەر زالدارى، 144 سۇلۋلىق سالوندارى، 62 مونشا (ساۋنا)، 6 كينوتەاتردىڭ جۇمىسى توقتاتىلدى.

«وربيتا» بازارى ءوز قىزمەتىن جالعاستىرۋدا، ناقتىلاي ايتقاندا جەڭىل كونسترۋكسيالى باستىرما استىندا ورنالاسقان ساۋدا قاتارلارى كۇشەيتىلگەن سانيتارلىق-دەزينفەكسيالىق رەجيم مەن سانيتارلى-كارانتيندى تالاپتاردى جانە قىزمەتكەرلەر مەن كەلۋشىلەر ۇستاناتىن شەكتەۋ شارالارىن ساقتاي وتىرىپ بەكىتىلگەن گرافيك بويىنشا ىستەۋدە. سونداي-اق جەكە تۇرعان سۋپەرماركەتتەر، ءدارىحانالار، اشىق اسپان استىنداعى جانە ۇجىمدىق شارالار وتكىزىلمەيتىن، زالىندا وتىرۋ ورىندارى 30-دان اسپايتىن عيماراتتار ىشىندەگى قوعامدىق تاماقتانۋ نىساندارىنا جۇمىس ىستەۋگە رۇقسات بەرىلگەن.

«قۇرامىنا جەرگىلىكتى پوليسيا قىزمەتى مەن اكىمشىلىك قىزمەتكەرلەرى كىرەتىن 17 توپ جۇمىس اتقارۋدا. ولار قالا تۇرعىندارىن كارانتين شارالارىن، الەۋمەتتىك اراقاشىقتىقتى جانە بەتپەردە رەجيمىن ساقتاۋ قاجەتتىگى ماسەلەلەرى بويىنشا اقپاراتتىق قۇلاقتاندىرۋ جۇمىستارىن جۇرگىزۋدە»، — دەپ باياندادى اۋدان اكىمى ورىنباسارى س. ادىلبايەۆ.

اقپاراتىق قۇلاقتاندىرۋ جۇمىستارى ماگيسترالدى كوشەلەردە، اۋلالار مەن بۇقارالىق دەمالۋ ورىندارىندا جۇرگىزىلەدى.
تۇڭعىش پرەزيدەنت اتىنداعى ساياباقتا حالىقتىڭ جاپپاي توپتاسۋىن بولدىرماۋ ماقساتىندا الەۋمەتتىك اراقاشىقتىقتى ساقتاۋ ءۇشىن ءقاۋىپسىز قاشىقتىقتى كورسەتەتىن بەلگىلەر بەلگىلەنگەن.

ودان بولەك، اۋداندا اعىمداعى جىلدىڭ 5 شىلدەسىنەن باستاپ كارانتين رەجيمى مەن سانيتارلىق- ەپيدەميولوگيالىق تالاپتاردى بۇزۋ جاعدايلارىن انىقتاۋ بويىنشا 12 ءموبيلدى توپ جۇمىس ىستەيدى. وسىلايشا، شىلدەنىڭ 5-نەن 17-نە دەيىن 153 نىسان تەكسەرىلدى. ولاردىڭ ىشىندە 18ء-ى قىزمەتتەرىن توقتاتىپ، 112 نىساننان ءتارتىپبۇزۋشىلىقتار انىقتالدى. نىسانداردىڭ بىرىنەن 30 ادامعا ارنالعان ۇجىمدىق بانكەتتىڭ وتكىزىلگەنى انىقتالدى. شارا توقتاتىلىپ، قوناقتار ۇيلەرىنە تاراپ، حاتتاما تولىتىرىلدى.

ماسكا رەجيمىن ساقتاماعانى ءۇشىن جەكە تۇلعالارعا قاتىستى 76 حاتتاما تولتىرىلدى. اۋدان تۇرعىندارىنىڭ اراسىندا ءتۇسىندىرۋ جۇمىستارى جۇرگىزىلۋدە.