72 ساعاتتىق ەسكەرتۋ مەرزىمى اياقتالعاننان كەيىن امەريكالىق ديپلوماتتار قىتايدىڭ چەندۋ قالاسىنداعى كونسۋلدىعىنان كەتتى.
وتكەن اپتادا تەحاس شتاتىنىڭ حيۋستون قالاسىنداعى جۇڭگو كونسۋلدىعىنىڭ جابىلۋىنا جاۋاپ رەتىندە جۇڭگو چەندۋ قالاسىنداعى امەريكانىڭ كونسۋلدىعىن جابۋعا بۇيرىق بەرگەن.
دۇيسەنبى كۇنى ەسكەرتۋدىڭ سوڭعى مەرزىمىنەن بۇرىن قىزمەتكەرلەردىڭ عيماراتتان كەتىپ جاتقانى كورىنگەن، تاقتالار الىنىپ، اقش جالاۋى تۇسىرىلگەن.
قىتايدىڭ سىرتقى ىستەر مينيسترلىگى عيماراتقا قىتايلىق قىزمەتكەرلەر سوڭعى مەرزىمنەن كەيىن كىرىپ، كونسۋلدىقتى "قابىلداپ الدى" دەپ مالىمدەگەن.
سوڭعى ۋاقىتتا اقش پەن جۇڭگو اراسىندا شيەلەنىس كۇشەيە ءتۇستى. قۇراما شتات پروكۋرورلارىنىڭ سوتقا بەرگەن مالىمەتتەرى بويىنشا، امەريكاداعى جۇڭگو زەرتتەۋشىلەرى ۆيزالىق الاياقتىعى ءۇشىن قاماۋعا الىنعان. ۆاشينگتون "ۆيزالىق الاياقتىق جاسادى جانە اسكەري بايلانىستاردى جاسىردى" دەپ كۇدىكتەنگەن جۇڭگو عالىمى سان-فرانسيسكوداعى جۇڭگو كونسۋلدىعىنا قاشىپ تىعىلعانىن مالىمدەگەن.
سارسەنبىدە ترامپ اكىمشىلىگى قىتايدىڭ حيۋستونداعى كونسۋلدىعىن 72 ساعات ىشىندە جابۋعا بۇيرىق بەرگەن.
اقش مەملەكەتتىك حاتشىسى مايك پومپەو ۆاشينگتوننىڭ شەشىمى قىتايدىڭ زياتكەرلىك مەنشىكتەردى "ۇرلاپ جاتقاندىعىنا" بايلانىستى قابىلدانعانىن مالىمدەگەن.
بەيجىڭ بۇل قادامدى "ساياسي ارانداتۋشىلىق" دەپ اتاعان.
ءبىراق ترامپ جۇڭگو كونسۋلدىقتارىنىڭ كوبىن جابۋعا بۇيرىق بەرەتىنى "ءارقاشان مۇمكىن" ەكەنىن مالىمدەگەن.
كەيىنىرەك جۇڭگو چەندۋ قالاسىندا ورنالاسقان اقش كونسۋلدىعىن جابۋعا بۇيرىق بەرگەن. جۇڭگو بۇل قادامدى اقش-قا "قاجەتتى جاۋاپ" دەپ اتادى. سەنبىدە بەيجىڭ حيۋستونداعى جۇڭگو كونسۋلدىعىنا اقش قۇقىق قورعاۋ ورگاندارى قىزمەتكەرلەرىنڭ "ءماجبۇرلى تۇردە" باسىپ كىرگەنىن ايتىپ ايىپتاپ، وعان دا ءتيىستى قايتارما ارەكەت جاسايتىنىن مالىمدەدى.
ۆاشينگتون بەيجىڭدى ساۋدا جانە كوروناۆيرۋستىق پاندەمياعا قاتىستى بىرنەشە رەت ايىپتاعان، سونداي-اق جۇڭگو گونكونگقا قاۋىپسىزدىك تۋرالى داۋلى جاڭا زاڭ قابىلدادى.
ال ترامپ قىتايدىڭ شىڭجاڭ پروۆينسياسىنداعى ەتنيكالىق قازاقتار مەن ۇيعىرلاردىڭ قىسىمعا ۇشىراۋىنا قاتىسى بار 50-گە جۋىق قىتايلىق كومپانياعا سانكسيا سالدى.
پىكىر قالدىرۋ