كوروناۆيرۋستان كوز جۇمعانداردى جەرلەۋ ەرەجەسى وكپە قابىنۋىنان قايتىس بولعاندارعا دا قولدانىلا ما؟ بۇل سۇراققا دەنساۋلىق ساقتاۋ ءمينيسترى الەكسەي سوي جاۋاپ بەردى. 

مينيستر وكپە قابىنۋىنان قايتىس بولعاندارعا كوروناۆيرۋستان كوز جۇمعانداردى جەرلەۋ ەرەجەسى قولدانىلاتىنىن ايتتى.

– بۇل بىردەي جاعداي. سوندىقتان ەمدەۋ شارالارىمەن قاتار باسقا دا پريسيپتەر ساقتالاتىن بولادى، – دەپ جاۋاپ بەردى مينيستر.

بۇعان دەيىن ەلدە كوروناۆيرۋس ىندەتىنەن قازا تاپقانداردى جەرلەۋ الگوريتمى ايقىندالعان قاۋلى شىققان. قاۋلىنىڭ قوسىمشاسىنا سايكەس، COVID-19-عا كۇدىكتى ادام قايتىس بولعاندا ەپيدەميولوگيالىق تەكسەرۋ جانە وسى جاعدايعا بايلانىستى باسقا دا ءىس-شارالار ەپيدەمياعا قارسى رەجيم تالاپتارىن ساقتاي وتىرىپ تەز ارادا جۇرگىزىلەدى. سوVID-19 دياگنوزى زەرتحانالىق راستالعان جاعدايدا قايتىس بولعان ادامنىڭ دەنەسى اشىلمايدى جانە تۋىستارىنا بەرىلمەيدى. ال COVID-19-عا كۇدىكتى قايتىس بولعاندا ءمايىت زەرتحانالىق زەرتتەۋ ناتيجەسى شىققانشا تۋىستارىنا بەرىلمەيدى.