الماتىدا ءبىرتۇتاس ينتەگراسيا قىزمەتىندە 7 مىڭ كت جانە رەنتگەن زەرتتەۋلەرى، 4 ملن استام كت كەسەكتەرى (قيىقتارى) ساقتالعان. بۇل تۋرالى قالالىق سيفرلاندىرۋ باسقارماسىنىڭ باسشىسى بايان قوڭىربايەۆ پەن IMedHub جوباسىنىڭ جەتەكشىسى رەناتا احماد ونلاين-بريفينگ بارىسىندا ايتتى.

بۇل جەردە راديولوگيالىق جانە باسقا دا زەرتتەۋلەر تۇرلەرىن ساقتايتىن مەديسينالىق مۇراعات جايلى ءسوز بولىپ وتىر. قازىرگى ۋاقىتتا قويمانىڭ جۇمىس باستاعانىنا 3 ايدان استام ۋاقىت بولدى. بۇگىندە مۇراعاتتا 7205 رەنتگەن جانە كت زەرتتەۋلەرى جانە 4 ملن استام كت كەسەكتەرى بار.

«ءبىزدىڭ مۇراعاتتى قولداناتىن بارلىق دارىگەرلەر تەك ءوز اۋرۋحاناسىنا عانا ەمەس، باسقا دا مەديسينالىق مەكەمەلەردىڭ زەرتتەۋلەرىنە ەركىن قول جەتكىزە الادى. ءبىز رەنتگەن ارقىلى وكپە اۋرۋىن انىقتايتىن ينتەگراسيالانعان جاساندى ينتەللەكت قىزمەتىن ۇسىنامىز. وسى باعىتتا جۇمىستى جالعاستىرىپ، باسقا دا اۋرۋحانالاردى قامتۋ جۇمىسىن كەڭەيتەتىن بولامىز. الداعى ۋاقىتتا بۇكىل قازاقستان بويىنشا قىزمەتتى ەنگىزۋدى جوسپارلاپ وتىرمىز»، — دەيدى رەناتا

دارىگەرلەر قۇرالدىڭ كومەگىمەن، ناۋقاستىڭ ەمدەلۋ بارىسىندا جاساعان رەنتگەن كەسكىندەرىن سالىستىرا وتىرىپ، ەمدەۋ قارقىنىن كورە الادى.
الماتى قالاسى اكىمدىگىمەن بىرلەسە وتىرىپ، ەمحانالارعا، اۋرۋحانالارعا جانە جەكە مەديسينالىق مەكەمەلەرگە قىزمەتتى قوسۋ ارقىلى جوبانى ءارى قاراي كەڭەيتۋ جوسپارلانۋدا. ءوتىنىشتى مەديسينالىق مەكەمەلەر imedhub.org ۆەب-سايتىندا قالدىرا الادى.