رۋحاني جاڭعىرۋ باعدارلاماسىنىڭ ءبىر تارماعى جاڭا گۋمانيتارلىق ءبىلىم – قازاق تىلىندەگى 100 جاڭا وقۋلىق باعدارلاماسى. 2017 جىلدان بەرى كىتاپتاردى اۋدارۋ جۇمىسىن قولعا العان ۇلتتىق اۋدارما بيۋروسىنىڭ باسشىسى راۋان كەنجەحان ۇلى ورتالىق كوممۋنيكاسيالار قىزمەتىندە جاڭا كىتاپتاردى تانىستىردى.

سپيكەردىڭ ايتۋىنشا بۇل جۇمىسقا 300-دەن استام عالىم، اۋدارماشى تارتىلعان. جوبا ماقساتى، دۇنيە جۇزىندەگى ەڭ ىرگەلى وقۋ ورىندارىنىڭ وقۋ باعدارلاماسىنا كىرگەن وقۋلىقتاردى قازاق تىلىنە اۋدارىپ، وتاندىق جوو-لارعا تەگىن جەتكىزۋ.

– بۇگىندە ەلىمىزدە 1،5 ملن ستۋدەنت بار. ولاردىڭ 70%-دان استامى قازاق تىلىندە ءبىلىم الىپ جاتىر. جوبانى ىسكە اسىرۋ ءۇشىن وقۋ ورىندارىنداعى فاكۋلتەتتەر قاجەتتى دەگەن كىتاپتاردىڭ ءتىزىمىن بەردى. بيىلعى اۋدارىلعان وقۋلىقتاردىڭ دەنى شىعارماشىلىق باعىتتا وقىتىلاتىن ستۋدەنتتەرگە ارنالدى، – دەدى ر.كەنجەحان ۇلى.

2017 جىلدان بەرى 77 وقۋلىق اۋدارىلىپ، ولار 10 مىڭ دانامەن باسىلىپ 132 جوو-نىڭ كىتاپ قورلارىنا جەتكىزىلگەن. سونىمەن قاتار ەلەكتروندى نۇسقالارى "قازاقستاننىڭ اشىق ۋنيۆەرسيتەتى" پورتالىنا ەنگىزىلدى.

سونىمەن، بيىلعى اۋدارىلعان 30 جاڭا كىتاپ – كينو-تەاتر ونەرى، مۋزىكا سالاسىنان الەمنىڭ ۇزدىك عالىمدارىنىڭ ەڭبەكتەرى جانە قۇقىقتانۋ باعىتىنداعى بىرنەشە باسىلىمدى قۇرايدى.

كىتاپتاردىڭ تولىق ءتىزىمىن 100 كىتاپتىڭ رەسمي سايتىنان كورۋگە بولادى.