مۇعالىمدەردىڭ قۇقىعىن بۇزعانى ءۇشىن اتا-انالار مەن مەكتەپ باسشىلىعى جازالاندى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ مالىمدەدى.
ول Facebook پاراقشاسىندا "پەداگوگ مارتەبەسى تۋرالى" زاڭنىڭ ماڭىزدى ەرەجەلەرىنىڭ ءبىرى – پەداگوگتى مىندەتىنە جاتپايتىن فۋنكسيالارعا تارتۋدان قورعاۋ، ورىنسىز ەسەپتىلىكتەن بوساتۋ. بۇل نورمالار جاڭا وقۋ جىلى قارساڭىندا وتە وزەكتى" دەپ جازعان.
مينيسترلىكتىڭ وسىعان قاتىستى قاتاڭ ۇستانىمدارىنا قاراماستان، وسى ەرەجەلەردى بۇزۋ جاعدايلارى كەزدەسكەن.
"وسىدان بىرنەشە اپتا بۇرىن لەنگىر مەكتەپ-ينتەرناتىندا اكىمشىلىك ءىس قوزعالدى، وندا پەداگوگتەردى لاۋازىمدىق مىندەتتەرىنە كىرمەيتىن جۇمىستارعا تارتقان. ءبىلىم سالاسىندا ساپانى قامتاماسىز ەتۋ دەپارتامەنتى وقيعا ورنىنا بارىپ، قىزمەتتىك تەكسەرۋ جۇرگىزدى.
فاكتىلەر راستالدى جانە مەكتەپ ديرەكتورىنىڭ م.ا. اكىمشىلىك جاۋاپكەرشىلىككە تارتىلدى. بۇعان دەيىن تۇركىستان وبلىسى كەنتاۋ قالاسىنداعى مولدا مۇسا اتىنداعى مەكتەپتە دە قىزمەتتىك تەكسەرۋ جۇرگىزىلدى. وندا ءمۇعالىمدى مەكتەپتى جوندەۋ جۇمىستارىنا تارتقان. اتالعان فاكتى تەكسەرۋ بارىسىندا راستالدى. مەكتەپ ديرەكتورىنىڭ مىندەتىن اتقارۋشى دا، كەنتاۋ قالالىق ءبىلىم ءبولىمىنىڭ قىزمەتكەرى دە اكىمشىلىك جاۋاپكەرشىلىككە تارتىلدى" دەپ جازدى مينيستر.
پىكىر قالدىرۋ