پرەزيدەنت قاسىم-جومارت توقايەۆ قازاقستان حالقىنا ارناعان جولداۋىندا ايتىلعان قۇقىق قورعاۋ سالاسى مەن سوت جۇيەسىن رەفورمالاۋدى جۇزەگە اسىرۋ ماسەلەلەرى جونىندە كەڭەس وتكىزدى.
مەملەكەت باسشىسىنىڭ ايتۋىنشا، الداعى وزگەرىستەردىڭ باستى ماقساتى – زاڭ ۇستەمدىگىن، ادىلەتتىلىكتى جانە ازاماتتاردىڭ قاۋىپسىزدىگىن قامتاماسىز ەتۋ.
جيىندا ازاماتتاردىڭ قۇقىقتارى مەن بوستاندىقتارىن قورعاۋدى قامتاماسىز ەتۋدىڭ ءۇش بۋىندى مودەلىن قۇرۋ جانە قۇقىق قورعاۋ ورگاندارى مەن سوت جۇيەسى وكىلەتتىلىكتەرىنىڭ ارا-جىگىن اجىراتۋ ماسەلەلەرىنە باسىمدىق بەرىلدى. پرەزيدەنت اتالعان جۇيە زاڭدىلىق پەن ادىلەتتىلىكتى قالىپتاستىرۋ مەحانيزمىنىڭ كەپىلى بولۋعا ءتيىس ەكەنىن اتاپ ءوتتى.
قاسىم-جومارت توقايەۆ «جاڭا جاعدايداعى قازاقستان: ءىس-قيمىل كەزەڭى» جولداۋىنداعى مىندەتتەردى جۇزەگە اسىرۋدىڭ نەگىزگى باعىتتارىن بەلگىلەپ، قۇقىق قورعاۋ ورگاندارى باسشىلارىنا ناقتى تاپسىرمالار بەردى.
كەڭەسكە پرەزيدەنت اكىمشىلىگىنىڭ باسشىسى ەرلان قوشانوۆ، پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى اسەت يسەكەشيەۆ، پرەمەر-مينيستردىڭ ءبىرىنشى ورىنباسارى ءاليحان سمايىلوۆ، پرەمەر-مينيستردىڭ ورىنباسارى ەرالى توعجانوۆ، پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ، باس پروكۋرور عيزات نۇرداۋلەتوۆ، ۇلتتىق قاۋىپسىزدىك كوميتەتىنىڭ ءتوراعاسى كارىم ءماسىموۆ، پرەزيدەنتتىڭ كومەكشىسى ەرلان قارين، قورعانىس ءمينيسترى نۇرلان ەرمەكبايەۆ، ىشكى ىستەر ءمينيسترى ەرلان تۇرعىمبايەۆ قاتىستى.
پىكىر قالدىرۋ