ورالدا ەرىكتى ءۇيدىڭ قابىرعاسىنا گراففيتي سالۋ كەزىندە قازا بولدى. بۇل تۋرالى موي گورود پورتالى حابارلادى.

وقيعا 1 قىركۇيەك كۇنى كەشكى ساعات 23:10-دا بولعان. 

ورال قالالىق پوليسيا باسقارماسىنىڭ حابارلاۋىنشا، 31 جاستاعى  سامات شايداللا ۇلى قونايەۆ شاعىن اۋدانىنداعى 10 قاباتتى ۇيدە گراففيتي سالعان سۋرەتشىگە كومەكتەسكەن.

– جۇمىس كەزىندە ول توبەدەن وتكەن جوعارى ۆولتتى سىمدارعا ءتيىپ كەتكەن. توك سوققىسىنان ول وقيعا ورنىندا قايتىس بولدى. وسى جاعداي  بويىنشا سوتقا دەيىنگى تەرگەۋ باستالدى، – دەدى ورال پوليسيا باسقارماسىنىڭ وكىلدەرى.

ول Uralsk Runners قوزعالىسىنىڭ ەرىكتىسى بولعان.

– سامات شاتىردا بولدى، ال مەن ششەتكا جۋىپ جاتىر ەدىم. ول Uralsk Runners قوزعالىسىنىڭ ەرىكتىسى بولدى. سامات بارىمىزگە كومەك كورسەتەتىن، تاماق اكەلىپ بەرەتىن. وتە وكىنىشتى، – دەدى سۋرەتشى اقمارال عازييەۆا.

بۇگىن 4 قىركۇيەك كۇنى ەرىكتىنى جەرلەۋ ءراسىمى بولىپ جاتىر.