نۇر-سۇلتان. قازاقپارات – ەلوردادا كارانتين تالاپتارىن ساقتاۋ ءۇشىن قۇرىلعان ءموبيلدى توپ «شاپاعات» بازارىنا تەكسەرۋ جۇرگىزدى، دەپ حابارلايدى قازاقپارات ءتىلشىسى.
ءموبيلدى توپ نۇر-سۇلتاننىڭ بارلىق اۋداندارىندا قۇرىلعان، ونىڭ قۇرامىندا اكىمدىك، جەرگىلىكتى پوليسيا قىزمەتى جانە تاۋارلار مەن كورسەتىلەتىن قىزمەتتەر ساپاسىن باقىلاۋ باسقارماسىنىڭ وكىلدەرى حالىق كوپ جينالاتىن ورىندارعا تۇراقتى تۇردە تەكسەرۋ جۇرىگىزىپ تۇرادى.
بايقوڭىر اۋدانى تاۋارلار مەن كورسەتىلەتىن قىزمەتتەر ساپاسىن باقىلاۋ باسقارماسىنىڭ ءبولىم باسشىسى اسىل سەرالىنىڭ ايتۋىنشا، جابىق بازارلاردىڭ جۇمىسىنا بىرنەشە تالاپ قويىلادى. قالانىڭ باس سانيتار دارىگەرىنىڭ قاۋلىسىمەن، جابىق ازىق-تۇلىك جانە وزگە دە بازارلار جۇمىس كۇندەرى ساعات 10:00-17:00 ارالىعىندا عانا جۇمىس ىستەۋى ءتيىس. 
دەمالىس كۇندەرى بۇل بازارلار جابىلىپ، تەك تازا اۋاداعى جارمەڭكەلەردىڭ جۇمىسىنا رۇقسات بەرىلگەن. ساۋدا ويىن-ساۋىق ورتالىقتارى دا كۇندەلىكتى 10:00-22:00 ارالىعىندا جۇمىس ىستەپ، دەمالىس كۇندەرى جابىلۋى ءتيىس.
«جابىق بازارلاردىڭ كىرەبەرىسىندە دەنە قىزۋىن ولشەيتىن قىزمەتكەر تۇرۋى قاجەت، ولار دەنە قىزۋى جوعارى ادامدى كىرگىزبەۋى كەرەك. سول جەردە كەلۋشىلەرگە قولجەتىمدى سانيتايزەر تۇرۋى قاجەت، مۇنداي سانيتايزەرلەر ءاربىر 50 مەتر سايىن ورناتىلۋى كەرەك. ءاربىر 2-3 ساعات سايىن ارنايى ەرىتىندىمەن تازالانۋى ءتيىس. ساتۋشىلار ماسكا، قولعاپ ءتارىزدى قورعانىس قۇرالدارىن پايدالانۋى قاجەت. ءوزى مەن كەلۋشىلەر ءۇشىن انتيسەپتيك قويۋى قاجەت. ءار كليەنتتەن كەيىن قولىن وڭدەپ، ءار 2 ساعات سايىن جۇمىس ورنىن دەزينفەكسيالىق ەرىتىندىمەن تازالاۋى ءتيىس. كەلۋشىلەر دە ماسكا تاعىپ، الەۋمەتتىك ارا قاشىقتىق ساقتاۋعا مىندەتتى»، - دەپ ءتۇسىندىردى اسىل سەرالى قازاقپارات تىلشىسىنە بەرگەن سۇحباتىندا.
اكىمشىلىك قۇقىق بۇزۋ تۋرالى كودەكستىڭ 425-بابىنا سايكەس، سانيتارلىق-ەپيدەميولوگيالىق زاڭناما تالاپتارى مەن گيگيەنالىق نورماتيۆتەردi بۇزعانى ءۇشىن جەكە تۇلعالارعا – 30 اەك، شاعىن كاسىپكەرلىك سۋبەكتىلەرىنە – 230 اەك، ورتا كاسىپكەرلىك سۋبەكتىلەرىنە – 310 اەك، ءىرى كاسىپكەرلىك سۋبەكتىلەرىنە –1600 اەك مولشەرىندە ايىپپۇل كوزدەلگەن.
سپيكەردىڭ ايتۋىنشا، قازىرگى ۋاقىتتا نۇر-سۇلتان قالاسى بويىنشا كارانتين رەجيمىن ساقتاماعان (ماسكا تاقپاۋ، قاشىقتىق ساقتاماۋ، حالىقتىڭ كوپ جينالۋى جانە ت.ب.) جەكە جانە زاڭدى تۇلعالارعا 414 ايىپپۇل سالىنعان.
«شاپاعات» بازارى بويىنشا دا تەكسەرۋشىلەر بىرنەشە ولقىلىقتى انىقتادى. 
«الەۋمەتتىك قاشىقتىق ساقتاۋ ءۇشىن ەدەنگە بەلگىلەر سىزىلماعان. ساتۋشىلار مەن كەلۋشىلەر ماسكا تاعۋ رەجيمىن بۇزىپ وتىر. ءبىر كىرەبەرىستە تەرومەتريا جۇرگىزىلىپ جاتقان جوق. سانيتايزەرلەر دە 50 مەتر سايىن ورناتىلىپ، حالىققا قولجەتىمدى بولۋى ءتيىس. بازاردىڭ ءبىر زالىندا سانيتايزەر كورىنبەدى. بۇل ولقىلىقتار بويىنشا اكىمشىلىك قۇقىقبۇزۋشىلىقتار تۋرالى كودەكستىڭ 425-بابىنا سايكەس شارا قابىلدايمىز»، - دەدى اسىل سەرالى.
«ساتۋشىلارعا ايىپپۇل سالىنا ما؟» دەگەن سۇراققا باسقارما وكىلى ءبىرىنشى كەزەكتە بازار اكىمشىلىگى جاۋاپقا تارتىلاتىنىن ايتتى.
«مۇندا بازار اكىمشىلىگى بارلىق جاعدايدى باقىلاۋى قاجەت. كىرەبەرىستەگى، زال ىشىندەگى كۇزەت قىزمەتى ەسكەرتۋ جاساپ، حالىقتىڭ توپتاسۋىنا جول بەرمەۋى كەرەك. قاجەت بولسا، ساتۋشىلارمەن بارلىق تالاپتى ساقتاۋ بويىنشا ينسترۋكتاج وتكىزۋى كەرەك»، - دەپ ءتۇسىندىردى ا. سەرالى.
ءوز كەزەگىندە بازار اكىمشىلىگى ايتىلعان ەسكەرتۋلەرمەن كەلىسپەيتىنىن، بارلىق تالاپتى ساقتاۋعا تىرىسىپ جاتقانىن جەتكىزدى.
«بارلىق كەلۋشىلەردى تەكسەرىپ، ماسكامەن عانا كىرگىزىپ جاتىرمىز. كەي ادامداردىڭ ماسكاسىنىڭ يەگىنە ءتۇسىپ كەتكەن، ءبىراق ءبىز ءار ادامنىڭ ماسكاسىن تۇزەپ جۇرە المايمىز عوي. كىرەبەرىستەردە دەزينفەكسيالىق كىلەمشەلەر ورناتىلعان. ءار 2 ساعات سايىن وڭدەۋ جۇمىستارىن جۇرگىزەمىز. تەكسەرۋشىلەر 2-قاباتقا كوتەرىلگەن جوق، وندا بۋتيكتەر جۇمىس ىستەيدى. ءار بۋتيكتىڭ الدىندا سانيتايزەر تۇر، 2-3 ادامنان ارتىق قىزمەت كورسەتپەيمىز دەگەن حابارلاما ىلىنگەن. ەدەنگە سالىنعان بەلگىلەر ادام كوپ جۇرگەندىكتەن، ءوشىپ كەتەدى. بۇل سىندى ەسكەرەمىز. سانيتايزەرلەر دە ورنىندا تۇر. جالپى شولۋ جاساعاندىقتان، تەكسەرۋشىلەر كورمەي قالۋى دا مۇمكىن. تالاپ ەتىلگەن بارلىق قاعيدانى ساقتاۋعا تىرىسىپ جاتىرمىز. ءيا، كەيدە ادام تولۋى مۇمكىن، ءبىراق ول ءۇشىن ايىپپۇل سالۋ قاجەت دەپ ەسەپتەمەيمىن. ەسكەرتۋ بەرسە دە، سول ولقىلىقتاردى تۇزەتەر ەدىك»، - دەيدى «شاپاعات» بازارىنىڭ اكىمشىسى ساۋلە ىدىرىسوۆا.
سونىمەن بىرگە، اكىمشى بازاردىڭ كارانتيندە قانداي شىعىنعا ۇشىراعانىن ايتىپ بەردى.
«ءار سەنبى-جەكسەنبى سايىن بازارىمىز جابىلادى. جالعا الۋشىلارىمىز ءبىر جارىم اي بويى ۇيىندە وتىردى. بۇل ارالىق ءۇشىن ولاردان ارەندالىق تولەم العان جوقپىز. بىزدە دە وسىنداي شىعىندار بار»، - دەيدى ساۋلە ىدىرىسوۆا.
ايتا كەتەيىك، 1 قىركۇيەكتە نۇر-سۇلتان قالاسىنىڭ باس مەملەكەتتىك سانيتار دارىگەرى ا. شاعالتايەۆانىڭ كارانتين شارالارىن كەزەڭ-كەزەڭمەن جەڭىلدەتۋ تۋرالى جاڭا قاۋلىسى جاريالاندى.
پىكىر قالدىرۋ