الماتىدا سانتەحنيك ءبىر وتباسىن پىشاقتاپ تاستاعان. كورشىلەردىڭ ايتۋىنشا، قىلمىسقا اقشا سەبەپ بولۋى مۇمكىن. رەسمي ورىندار قازىرگى ۋاقىتتا تەرگەۋ باستالعانىن حابارلادى.

جانتۇرشىگەرلىك وقيعا ەكى قاباتتى ۇيدە بولعان. كۋاگەرلەردىڭ ايتۋىنشا، سانتەحنيك ازامات سول كۇنى پاتەرگە جوندەۋ جۇمىستارىن جاساۋعا كەلگەن. ارتىنشا ءۇي يەلەرىمەن سوزگە كەلىپ قالعان. 

وقيعا كۋاگەرى وكسانا فەللەر، قاندى وقيعانى كوزىمەن كورگەن. ونىڭ ايتۋىنشا، پاتەردە اناسى مەن ونىڭ 32 جاستاعى قىزى بولعان.

– مارقۇم يننا سانتەحنيك ازاماتتى عالامتور ارقىلى تاپتى. ءبىر كۇن بۇرىن شاقىرىپ، الدىن-الا 250 مىڭ تەڭگە بەرگەن. نەگىزى ارالارىندا اقشاعا بولا ۇرىس بولدى دەگەنمەن كەلىسپەيمىن. كەرىسىنشە قاسكوي بۇلاردان اقشا ۇرلاماق بولعان. سوندىقتان ءبارىن پىشاقتاپ تاستاعان. قىلمىسكەر 32 جاستاعى قىزىنا پىشاق سالعاندا كومەككە ۇمتىلعان اناسى مەن كورشىسى دە جاراقات العان، – كۋاگەر وكسانا فەللەر.

قىزىن قۇتقارماق بولعان اناسىنىڭ دا جاعدايىن دارىگەرلەر تىم اۋىر دەپ وتىر. 35 جاستاعى كورشىسى دە اۋرۋحانادا جاتىر.   

– جۇرەكتىڭ سول جاق قارىنشاسىنىڭ جاراقاتىمەن، سول جاق كەۋدە قۋىسىنىڭ پىشاقپەن كەسىلگەن بىرنەشە جاراقاتتارى، سول جاق وكپەنىڭ تومەنگى بولىگىڭ جاراسى، مويىن تامىرى مەن شاپتىڭ پىشاقپەن جاراققاتتانۋى. ناۋقاس رەانيماسيالىق بولمە جاعدايىندا ەم الۋدا. جالپى جاعدايى اۋىر، – دەيدى ، الماتى قالالىق قوعامدىق دەنساۋلىق باسقارماسىنىڭ باسپا ءسوز قىزمەتىنىڭ مامانى اقشولپان ءجۇسىپوۆا.

قالالىق پوليسيا دەپارتامەنتى، كۇدىكتىنىڭ بۇرىن سوتتالعانىن ايتتى. تەرگەۋ كەزىندە ول ءوز كىناسىن تولىق مويىنداعان.

– قازىرگى تاڭدا قىلمىستىق كودەكستىڭ 99 بابىنىڭ 2 تارماعى بويىنشا قىلمىستىق ءىس قوزعالدى. ازامات قاماۋعا الىندى. پىشاق بويىنشا ارنايى ساراپتاما تاعايىندالدى. بۇرىن بۇل ازامات ءىستى بولعان مۇلىكتىك قىلمىستار جاساعانى ءۇشىن. ءقازىر كۇدىكتى ازاماتقا "ادام ءولتىرۋ"  بابى بويىنشا تەرگەۋ ءجۇرىپ جاتىر. ال ءمايىت پەن  جاراقات العان جاندارعا سوت مەديسينالىق ساراپتاماسى تاعايىندالعان، – دەدى قالالىق پوليسيا دەپارتامەنتىنىڭ رەسمي وكىلى سالتانات ازىربەك.