بۇگىن كانديداتتار الداعى دەباتتارعا قاتىسۋ ءۇشىن وزدەرىنىڭ رەتتىك نومىرلەرىن تىكەلەي ەفيردە ءبىلدى.

«Nur Otan» پارتياسى الماتى قالالىق فيليالى ءتوراعاسىنىڭ ءبىرىنشى ورىنباسارى ستانيسلاۆ كانكۋروۆتىڭ ايتۋىنشا، كوپشىلىك پىكىرسايىسقا قاتىسۋشىلاردىڭ جەرەبەسى لوتو قاعيداتى بويىنشا ونلاين رەجيمدە وتكىزىلەدى. جەرەبە تارتۋ ءراسىمىن كينو مەن تەاتردىڭ تانىمال اكتەرلەرى ازامات ساتىبالدى مەن گۇلباحرام بايبوسىنوۆا وتكىزدى.

«تىكەلەي ەفيردە جۇرگىزۋشىلەر اشىق باراباننان كەزدەيسوق نومىرلەردى الىپ شىعاردى، وسى ۋاقىتتا ۇلكەن ەكراندا كانديداتتاردىڭ دەرەكتەرى الفاۆيتتىك رەتپەن كورسەتىلدى. وسىلايشا، ءاربىر قاتىسۋشى تىكەلەي ەفيردە «Nur Otan» پارتياسىنىڭ الماتى قالالىق جانە اۋداندىق فيليالدارىنىڭ رەسمي اككاۋنتتارىندا دەباتقا قاتىسۋ ءنومىرىن، ۋاقىتى مەن كۇنىن كورە الدى. بۇل شارالار كارانتيندىك شارالاردى قاتاڭ ساقتاۋ قاجەتتىلىگىنەن، سونداي-اق جەرەبە تاستاۋ ءراسىمىنىڭ ماكسيمالدى اشىقتىعىن ارتتىرۋ ماقساتىندا تۋىندادى»، - دەدى كانكۋروۆ.

جاريا پىكىرسايىس 14- قىركۇيەكتەن باستالىپ، 30- قىركۇيەكتە اياقتالادى.

ەستەرىڭىزگە سالا كەتەيىك، الماتىدا 225 قاتىسۋشىنىڭ ىشىنەن پرايمەريزگە ايەلدەردىڭ 35% - ى، 35 جاسقا دەيىنگى جاستاردىڭ 32% - ى، سونداي-اق ەرەكشە قاجەتتىلىكتەرى بار ادامدار، كوپ بالالى انالار، ەرىكتىلەر جانە باسقالار تىركەلگەن.

ۇگىت جۇمىستارى 7 قىركۇيەكتە باستالدى جانە بۇگىنگى كۇنى كانديداتتار ZOOM ارقىلى باستاۋىش پارتيا ۇيىمدارىنىڭ توراعالارىمەن ونلاين-كەزدەسۋلەر، كارانتيندىك نورمالاردى قاتاڭ ساقتاي وتىرىپ، اشىق الاڭداردا جانە جەلدەتىلەتىن ءۇي-جايلاردا وفلاين كەزدەسۋلەر ارقىلى 300-دەن استام ءىس-شارا وتكىزدى.

«Nur Otan» پارتياسى الماتى قالالىق فيليالىنىڭ باسپا ءسوز قىزمەتى