الەۋمەتتىك جەلىدە بىرەنشە قىزدىڭ وقۋشى قىزدى اياۋسىز سوققىعا جىعىپ جاتقان ۆيدەو تاراعان. وقيعا اقتوبە وبلىسى تەمىر اۋدانى شۇبارشى اۋىلىندا بولعانى انىقتالدى.
جەلىدە جاريالانعان ۆيدەو كادرلارىندا بىرنەشە مەكتەپ جاسىنداعى قىزدىڭ سىنىپتاستارىن قالاي ۇرعانى كورسەتىلگەن. قىزداردىڭ ءبىرى كۇرەس ادىستەرىن قولدانىپ، جابىرلەنۋشىنى شاشىنان سۇيرەپ، باسىن تىزەسىمەن قىسقان.
كامەلەتكە تولماعانداردىڭ ءوز سىنىپتاستارىن ۇرىپ-سوعۋ فاكتىسى بويىنشا تەمىر اۋداندىق پوليسيا ءبولىمى تەكسەرىس جۇرگىزۋدە.
"الدىن الا مالىمەتتەر بويىنشا، 9-سىنىپتىڭ ءۇش وقۋشىسى ادەپسىز قارىم-قاتىناسقا بايلانىستى سىنىپتاسىن ۇرىپ-سوعىپ، بولىپ جاتقاننىڭ ءبارىن ۇيالى تەلەفوننىڭ كامەراسىنا تۇسىرگەن. سونىمەن قاتار، كامەلەتكە تولماعاندار ءىسى جونىندەگى ينسپەكتورلار اۋداننىڭ وقۋ ورىندارىندا پروفيلاكتيكالىق اڭگىمە وتكىزدى" دەلىنگەن اقتوبە وبلىسى پد باسپا ءسوز قىزمەتىنىڭ حابارلاماسىندا.
ءبىراز ۋاقىتتان كەيىن جەلىدە سىنىپتاستارىن سوققىعا جىققان قىزداردىڭ كەشىرىم سۇراعان ۆيدەوسى پايدا بولدى.
"اشۋ ۇستىندە بولدى ونىڭ بارلىعى. ادام اشۋ ۇستىندە نە ىستەمەيدى، سول كەزدە مەن ونىڭ شاشىنان تارتىپ سۇيرەدىم. بارلىعىنا مەن جاۋاپتىمىن، بارلىعى ءۇشىن دە كەشىرىم سۇرايمىن" دەلىنگەن ەكىنشى ۆيدەودا.
پىكىر قالدىرۋ