جاقىندا ەلوردادا قوس تەاترعا جاڭا ديرەكتور تاعايىندالعانى تۋرالى اقپارات تارادى. قاليبەك قۋانىشبايەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ باسشىلىعىنا ەرنار جۇماتايەۆ كەلسە، جاڭادان اشىلعالى جاتقان مەملەكەتتىك مۋزىكالىق بالالار مەن جاسوسپىرىمدەر تەاترىنا اسحات ماەميروۆ ديرەكتور اتاندى. الايدا سوڭعىسى ەلدەگى ەپيدەميولوگيالىق جاعدايعا بايلانىستى رەسمي تۇردە قاشان اشىلاتىنى ازىرگە بەلگىسىز. پاندەميا جاعدايىندا بيۋدجەت ەسەبىنەن ءبىر قالادا باعىتى مازمۇنداس ەكى تەاتردى ۇستاۋ قانشالىقتى قاجەت؟ قامشى ءتىلشىسى نۇر-سۇلتان قالاسىنىڭ اكىمدىگىنەن ماسەلەگە قاتىستى جاۋاپ الۋعا تىرىستى.

قالا اكىمدىگى جاڭا تەاتردى اشۋعا ەلوردالىق اتا-انالاردىڭ بالالارعا ارنالعان تەاتر اشۋ تۋرالى ۇسىنىسى مۇرىندىق بولعانىن مالىمدەدى. مادەنيەت وشاعىندا ونەرگە قابىلەتتى جاس دارىندى مەكتەپ وقۋشىلار مەن مۇمكىندىگى شەكتەۋلى بالالار ءوز شىعارماشىلىعىن شىڭدايتىن كورىنەدى.

اكىمدىك جاۋابىندا بۇل ماقساتقا بيۋدجەتتەن ەشقانداي قارجى جۇمسالمايتىنى حابارلانعان.

"ەلوردادا قالا بيۋدجەتىنەن شىعىن شىعارىلىپ جاڭا تەاتر اشىلعان جوق. بۇل – باسى اشىق نارسە. وسىعان دەيىن نۇر-سۇلتان قالاسىنىڭ اكىمدىگىنە قاراعان ق.قۋانىشبايەۆ اتىنداعى قازاق مەملەكەتتىك اكادەميالىق مۋزىكالىق دراما تەاترى جاڭا عيماراتقا كوشۋىنە جانە رەسپۋبليكالىق بيۋدجەت ارقىلى قارجىلاندىرىلۋىنا بايلانىستى ق ر مادەنيەت جانە سپورت مينيسترلىگىنىڭ باسقارۋىنا بەرىلەدى. ال ق.قۋانىشبايەۆ تەاترىنىڭ بوساعان بۇرىنعى عيماراتىندا – بيۋدجەتتەن ەشقانداي شىعىن شىعارىلماي ەلوردالىق جاس ۇرپاقتىڭ بويىنا رۋحاني-ەستەتيكالىق قۇندىلىقتاردى دارىتۋ ءۇشىن مۋزىكالىق جاس كورەرمەندەر ۇجىمى جۇمىسىن جالعاستىرادى"، – دەلىنگەن اكىمدىك تاراپىنان بەرىلگەن جاۋاپتا.

ق.قۋانىشبايەۆ تەاترى 1 قازاننان باستاپ جاڭا عيماراتقا كوشەتىنىن مەكەمەنىڭ جاڭا ديرەكتورى ەرنار جۇماتايەۆ راستادى.

– بۇل تەاتر – استانانىڭ ىستىعىنا دا، سۋىعىنا دا كونگەن تەاتر. مۇندا كەلگەنىمە 2 كۇن عانا بولدى. قاي جەرگە بارسام دا قازاق ونەرىنە قىزمەت ەتەمىن عوي. مەنىڭ قازىرگى باستى ميسسيام – ۇجىمدى امان-ەسەن جاڭا عيماراتقا كوشىرۋ، – دەدى ول. 

ەندى اشىلاتىن بالالار مەن جاسوسپىرىمدەر تەاترىنا قىركۇيەك ايىنىڭ 29-30-ى كۇندەرى كاستينگ ارقىلى اكتەرلەر ىرىكتەلمەك. كەيىن بىرتىندەپ اكىمشىلىكتەن باستاپ، تەاترداعى وزگە دە بولىمدەر انىقتالادى.

اسحات ماەميروۆ ءىسساپاردا ءجۇر دەگەن ونىڭ جەكە كومەكشىسى ءادىلعازى كەرەيەۆ ەلدەگى ەپيدەميولوگيالىق  احۋالعا بايلانىستى جاڭا تەاتردىڭ رەسمي اشىلۋى قاشان بولاتىنى ازىرگە بەلگىسىز ەكەنىن حابارلادى.

تەاتر باسشىلارىن تاعايىنداۋ تۋرالى رەسمي قاۋلى ءالى شىقپاعان. قامشى ءتىلشىسى نۇر-سۇلتان قالاسىنىڭ مادەنيەت باسقارماسىنا حابارلاسىپ، ماسەلەگە بايلانىستى تۇسىنىك بەرۋىن سۇراعانىندا تۇتقانىڭ ارعى جاعىنداعى قىزمەتكەر "ەشقانداي ارتىق اقپارات بەرە المايمىز" دەپ جاۋاپ بەردى.