مالىمدەمەدە ارمەنيا بىرلەسكەر ۇندەۋدە تاۋلى كاراباقتاعى قاقتىعىس كەزىندە كۇش قولدانۋ ايىپتالعانىن جاقتايتىنىن جەتكىزگەن.

 

"ارمەنيا ءوزى مەن ارساحقا (تاۋلى كاراباحتاعى تاۋەلسىزدىگى مويىندالماعان مەملەكەت) قارسى ازەربايجاننىڭ قاتەرى مەن كۇش قولدانۋىن، تۇركيانىڭ اسكەري قيمىلدارعا تىكەلەي ارالاسقانىن ايىپتايدى. ازەربايجان مەن تۇركيانىڭ بىرلەسكەن اگرەسسياسى، سونداي-اق شەتەلدىك تەرروريستەردىڭ ارالاسۋى ايماقتاعى تىنىش ءارى بەيبىت ءومىردىڭ شىرقىن بۇزادى. سول ارقىلى كەڭ اۋقىمدى سوعىس قاتەرىن تۋعىزدى. ارساحقا قارسى اگرەسسيا دەرەۋ توقتاتىلۋى كەرەك. ارمەنيا تاۋلى كاراباح كونفليكتىنىڭ بەيبىت شەشىلگەنىن قالايدى. ءبىز ارساحقا قارسى اگرەسسياعا باتىل تۇردە قارسى شىعا وتىرىپ، وبسە مينسك توبى ءتوراعا ەلدەرىنىڭ 1994-1995 جىلدارداعى كەلىسىمگە ساي، وق اتۋدى توقتاتۋ باعىتىندا جۇمىس ىستەۋگە ءازىرمىز" دەلىنگەن مينيسترلىك تاراتقان اقپاراتتىق حابارلامادا.

 

تاۋلى كاراباحتاعى قاقتىعىس 27 قىركۇيەكتەن بەرى جالعاسىپ كەلەدى. ەكى تاراپ جانجالدىڭ باستالۋىنا ءبىرىن-بىرى كىنالايدى.

 

تاۋلى كاراباح ازەربايجان رەسپۋبليكاسى اۋماعىنداعى اۆتونوميالىق وبلىس. وبلىس تولىقتاي ازەربايجاننىڭ اۋماعىندا جاتىر. ەشقانداي ەلمەن شەكتەسپەيدى. 

 

1992-1994 جىلدارى ارمەنيا ايماقتا ەتنيكالىق ارميانداردىڭ تۇرىپ جاتقانىن جەلەۋ ەتىپ اسكەر كۇشىمەن تاۋلى كاراباح ولكەسى مەن ىرگەلەس جاتقان جەتى اۋداننىڭ جەرىن باسىپ العان. اككۋپاسيالانعان جەر ازەربايجان تەرريتورياسىنىڭ 20 پايىزىن قۇرايدى.

 

ول ساتتە تاۋلى كاراباحتا 170 مىڭ ازامات تۇرعان. ونىڭ 130 مىڭى ارمياندار، قالعانى ازەربايجاندار ەدى.

 

1994 جىلى وبلىستا وق اتۋدى توقتاتۋ تۋرالى كەلىسىم جاسالار ساتتە ازەربايجان جەرىنە ميلليونعا جۋىق بوسقىن كەلگەن.

 

1994 جىلدان بەرى اتالعان ايماققا قاتىستى كەلىسسوزدەر اقش، فرانسيا، رەسەي تەڭتوراعالارى سانالاتىن وبسە-نىڭ مينسك توبى دەگەن اتپەن جالعاسىپ كەلەدى.