اتىراۋ-اقتوبە تاسجولىندا ءىرى جول اپاتى بولىپ، سالدارىنان 9 ادام قازا تاپتى. بۇل تۋرالى ىشكى ىستەر ءمينيسترى ەرلان تۇرعىمبايەۆ ءوزىنىڭ facebook-تاعى پاراقشاسىندا حابارلادى.
"بۇگىن 4 قازان كۇنى اتىراۋ وبلىسىندا قايعىلى جول-كولىك وقيعاسى ورىن الدى. اتىراۋ-اقتوبە باعىتىنداعى تاس جولدا ەكى كولىك سوقتىعىسىپ، سالدارىنان ەكى كولىكتىڭ جۇرگىزۋشىسى، جولاۋشىلار – بارلىعى 9 ادام تۇگەلدەي كوز جۇمدى. قازىرگى ۋاقىتتا قازا تاپقانداردىڭ اتى-جوندەرى انىقتالۋدا، وقيعا ورنىندا جەدەل تەرگەۋ توبى جۇمىس ىستەپ جاتىر" دەلىنگەن مينيستر جازباسىندا.
ونىڭ سوزىنشە، جول-كولىك وقيعالارىنىڭ 96 پايىزى جۇرگىزۋشىلەردىڭ كىناسىنەن بولادى.
"ءىىم-نىڭ ستاتيستيكالىق مالىمەتتەرى "تاجىريبەسىز" جۇرگىزۋشىلەردىڭ (كولىك جۇرگىزۋ ءوتىلى 1 جىلدان تومەندەر) ۇلەسىنە جول-كولىك وقيعالارىنىڭ تەك 1،8 پايىزى عانا تيەتىنىن كورسەتەدى. جول اپاتتارىنىڭ باسىم بولىگى تاجىريبەلى جۇرگىزۋشىلەردىڭ تاراپىنان ورىن الادى ەكەن. ولار ءقاۋىپتى تاۋەكەلدەرگە سانالى تۇردە بارىپ، وزدەرىنىڭ عانا ەمەس، باسقا ادامداردىڭ ومىرىنە دە ۇلكەن قاتەر توندىرەدى.
سونداي-اق ىشكى ىستەر مينيسترلىگى جول-كولىك وقيعاسىنىڭ نەگىزگى سەبەپتەرىن قاپەرلەرىڭىزگە سالادى:
- ءبىرىنشى ورىندا جىلدامدىقتى ارتتىرۋ (33،1 %)
- ەكىنشىسىندە – مانيەۆر جاساۋ ەرەجەلەرىن بۇزۋ (17،7 %)
- ءۇشىنشى ورىندا – رەتتەلمەيتىن جاياۋ جۇرگىنشىلەر وتكەلىنەن ءوتۋ ەرەجەلەرىن بۇزۋ (7،6 %)" دەپ جازدى تۇرعىمبايەۆ.
پىكىر قالدىرۋ