"اقتوبە وبلىسىندا مەشىتتىڭ 27 جاستاعى يمامى نۇرلىبەك سابىرعالييەۆ وزىنە چات اشىپ، بويداق قىز-كەلىنشەكتەردىڭ باسىن اينالدىرىپ، ارتىنشا تالاق ەتىپ كەتۋدى ادەتكە اينالدىردى". نازار حاقنازار ەسىمدى جەلى قولدانۋشىسى پاراقشاسىندا وسىلاي دەپ مالىمدەمە جاساپ، قازاقستان بيلىگىنەن اراشا سۇرادى.
ونىڭ ايتۋىنشا، قمدب نۇرلىبەك سابىرعالييەۆتى يمامدىقتان بوساتقان. الايدا ول ءدىني باسقارمادان "ءوز ەركىمەن جۇمىستان كەتتى" دەپ قانا الاستاتىلعان كورىنەدى.
بۇرىنعى يمامنىڭ ءدىني باسقارمادان شىعارىلۋى وعان توقتاۋ بولماعان سەكىلدى. شاعىمدانۋشىنىڭ سوزىنشە، يمام ءبىر جەردەن ەكىنشى جەرگە بارىپ، ارام پيعىلىن ىسكە اسىرۋىن جالعاستىرىپ ءجۇر.
– ول – زينانى حالالداندىرىپ جۇرگەن الاياق. زيناقور يمام كەزەكتى سۇلۋىن قۇشۋدى جوسپارلاپ قۇلسارى قالاسىنا دا كەلىپ جەتكەن. بۇل جولى سۇر مەرگەننىڭ جەبەسى بايگۋرشيموۆ راشيت ەسىمدى ازاماتتىڭ اپاسىن كوزدەگەن ەكەن. ەكىنشى ايەل قىلىپ الاتىن بولىپ قىزدىڭ اكە-شەشەسىنىڭ رۇقساتىن العان. مەشىت ۇستاپ وتىرعان يمامعا كىم كۇمان كەلتىرەدى؟ ر.بايگۋرشيموۆ اعايىن تۋمالارىن جيناپ، مال سويىپ، قوناعاسىن بەرىپ، الگى يمام مەن اپاسىنىڭ نەكەسىن قيدىرتقان. نەكەسى قيىلعان يمام سول كۇنى اقتوبەگە كەتىپ قالىپ، ەرتەسى كۇنى نەكەلەنگەن جارىنا اۆتوماتتى تۇردە تالاق بەرگەن... ارتىنشا يمام قۋلىعىن اسىرا المايتىنىن سەزىپ جىلىويدان تابانىن جالتىراتقان، – دەلىنگەن جازباسىندا.
كەيىننەن يمام بۇرىنعى قايىناعاسى ر.بايگۋرشيموۆتەن كەشىرىم سۇراپ، ايىپشاپان رەتىندە 1 ميلليون تەڭگە اقشانى شوتىڭا لاقتىرىپ جىبەرەمىن دەپ اقتوبەگە كەرى قايتادى. ءسويتىپ، 2020 جىلدىڭ 3 قازانىندا قايتا قوڭىراۋ شالىپ، اقشا الىپ كەلىپ تۇرعانىن جەتكىزەدى. اقشانى الماق بولعاندا دايىن تۇرعان وپەراتيۆتىك توپ جازىقسىز جاننىڭ قولىنا كىسەن سالعان كورىنەدى.
جازبا اۆتورىنىڭ ايتۋىنشا، قۇقىق قورعاۋ قىزمەتكەرلەرى يمامنىڭ وتىرىكتەرىنە دالەلسىز سەنگەندىكتەن، ءقازىر ءىس ءبىرجاقتى قارالىپ جاتىر.
وسىلايشا، نازار حاقنازار ەسىمدى جەلى قولدانۋشىسى كوپتەگەن سۇراقتارىن جاۋدىرتىپ، جىلىوي حالقىنىڭ جانايقايىن جەتكىزىپ وتىر.
قامشى – ەركىن اقپارات الاڭى. سايتتا جاريالانعان ماقالالار باسىلىمنىڭ كوزقاراسىن بىلدىرمەۋى مۇمكىن. ءدال وسى ماسەلە بويىنشا ەكىنشى تاراپتىڭ ايتارى بولسا، قامشى ونى دا جاريالاۋعا ءازىر.
