كەلىسىم ماسكەۋدە ارمەنيا مەن ازەربايجان ەلدەرىنىڭ سىرتقى ىستەر مينيسترلەرى زوگراب مناساكانيان مەن دجەيحۋن بايرام كەلىسسوزدەرىنىڭ قورىتىندىسى نەگىزىندە جاسالعان.

تاراپتار رەسەيدىڭ سىرتقى ىستەر ءمينيسترى سەرگەي لاۆروۆتىڭ باستاماشىل بولۋىمەن جابىق فورماتتا جۇزدەسكەن. كەزدەسۋ ون ساعاتتان استام ۋاقىتقا سوزىلىپ، سەنبىدە تاڭعا جۋىق اياقتالدى.

كەلىسسوز ناتيجەسى بويىنشا تاراپتار تومەندەگىدەي كەلىسىمگە كەلدى:

1) 2020 جىلدىڭ 10 قازانى ساعات 12:00-دەن باستاپ گۋمانيتارلىق ماقساتتا اتىس توقتاتىلىپ، تۇتقىنداعى اسكەريلەر مەن وزگە ازاماتتار، قازا تاپقانداردىڭ دەنەسى حالىقارالىق قىزىل كرەست كريتەرييلەرى بويىنشا الماستىرىلادى؛

2) اتىستى توقتاتۋدىڭ ناقتى قادامدارى قوسىمشا كەلىسىلەدى؛

3) ازەربايجان رەسپۋبليكاسى مەن ارمەنيا رەسپۋبليكاسى ەۋروپاداعى قاۋىپسىزدىك ىنتىماقتاستىق ۇيىمى مينسك توبى تەڭتوراعالارىنىڭ ىقپالىمەن جاعدايدى رەتتەۋدىڭ بازالىق پرينسيپتەرى بويىنشا بەيبىت رەتتەۋگە جول جەتكىزۋ ماقساتىمەن سۋبستانتيۆ كەلىسسوزدەرگە كىرىسەدى؛

4) تاراپتار پروسەسس كەلىسسوزى فورماتىنىڭ وزگەرتىلمەۋىنە كەلىسەدى.

تاۋلى كاراباقتاعى قاقتىعىس 27 قىركۇيەكتە باستالعان. تاراپتار جانجالدىڭ باستالۋ سەبەبىن بىر-بىرىنەن كورەدى. ارميان جانە ازەربايجان كۇشتەرى اراسىنداعى ۇرىس بىرنەشە فرونتتا ءجۇردى. ۇرىستا دروندار، ارتيللەريا، اۋىر تەحنيكا مەن راكەتالىق كەشەندەر قولدانىلدى. ەكى جاقتان دا بەيبىت تۇرعىندار وپات بولعان.