قىرعىزستان پرەزيدەنتى سوورونباي جەەنبەكوۆ ەلدەگى جاعدايعا بايلانىستى مالىمدەمە جاسادى. بۇل تۋرالى كابار پورتالى حابارلادى.
"قۇرمەتتى وتانداستار!
كەيبىر ساياساتكەرلەردىڭ شەكتەن تىس امبيسياسىنىڭ كەسىرىنەن ءبىزدىڭ ازاماتتاردىڭ بەيبىت ءومىرى مەن ەل تىنىشتىعىنا ءقاۋىپ ءتوندى.
ساياسي ۇراندارمەن قاتار، ەلدىڭ بىرلىگى مەن قوعامنىڭ بەيبىت ومىرىنە نۇقسان كەلتىرەتىن ۇندەۋلەر دە ايتىلدى.
قىرعىزستانعا قاۋىپ-قاتەر ءتونىپ تۇر.
قىمباتتى قىرعىزستاندىقتار، حالقىمىزدىڭ بەيبىت ءومىرى ساياسي ويىننىڭ قۇربانى بولماۋى كەرەك. سول ءۇشىن بىشكەكتە توتەنشە جاعداي رەجيمى ەنگىزىلدى. بۇگىن مەن سول تۋرالى ءتيىستى جارلىققا قول قويدىم.
كونستيتۋسيالىق قۇزىرەتىمنىڭ اياسىندا مەن ازاماتتاردىڭ تىنىش ءومىرى مەن ەلدىڭ تۇتاستىعىن ساقتاۋ ءۇشىن قولىمنان كەلگەننىڭ ءبارىن جاسايمىن. ەلىمىزدىڭ بۇكىل كۇشى مەنى تولىق قولدايدى دەپ سەنەمىن. بۇگىن ءبىز ەلدىگىمىزگە شىنايى ءقاۋىپ تونگەنىنە كۋا بولىپ وتىرمىز. سوندىقتان بەي-جاي قاراپ تۇرماي، وسى قيىن كۇندەردەن بىرگە شىعايىق.
جاراتقان حالقىمىزعا جانە سۇيىكتى قىرعىزستانىمىزعا جار بولسىن!" دەلىنگەن حابارلامادا.
پىكىر قالدىرۋ