«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك قوستاناي وبلىسىنا جۇمىس ساپارى بارىسىندا ارقالىقتا بولىپ، پارتيانىڭ سايلاۋالدى باعدارلاماسىنىڭ جوباسىندا ەسكەرىلەتىن قالاداعى ءتۇيىندى ماسەلەلەردى تالقىلادى. بۇل تۋرالى ول Facebook جەلىسىندەگى پاراقشاسىندا مالىمدەدى.

«ارقالىققا كەلدىم. تۇرعىندارمەن بىرگە «Nur Otan»-نىڭ قالالىق سايلاۋالدى باعدارلاماسىنىڭ جوباسىن تالقىلادىق.

وزدەرىڭىز بىلەتىندەي، پارتيا ليدەرى ن.ءا.نازاربايەۆتىڭ تاپسىرماسىمەن ءاربىر ەلدىمەكەننىڭ ەرەكشەلىگى مەن ماسەلەلەرىن ەسكەرە وتىرىپ، «Nur Otan» تۇڭعىش رەت ءار ءوڭىر، قالا مەن اۋدان بويىنشا 216 سايلاۋالدى باعدارلامانىڭ جوبالارىن ازىرلەدى.

ەلباسى اتاپ وتكەندەي، «Nur Otan» – ناقتى ىستەردىڭ پارتياسى، ءبىزدىڭ سايلاۋالدى ۋادەلەرىمىزدىڭ بارلىعى تىڭعىلىقتى ەسەپتەلۋى ءتيىس». سوندىقتان 5 جىلدىق باعدارلامالاردا كورنەكى ينديكاتورلار كورسەتىلدى، بيۋدجەتتىڭ مۇمكىندىگىمەن سايكەستەندىرىلگەن ناقتى باسىمدىقتار رەتى كوزدەلدى. ەل پرەزيدەنتى ق.ك.توقايەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسى ىسكە اسىرىلا وتىرىپ، پارتيانىڭ بارلىق سايلاۋالدى باعدارلامالارى ازاماتتاردىڭ تالاپ-تىلەكتەرى ەسكەرىلىپ پىسىقتالادى.

سونىمەن، ارقالىق قالاسىندا پارتياىشىلىك پرايمەريز بارىسىندا 117 ناقتى ۇسىنىس ءتۇستى. تۇرعىنداردى اۋلا الاڭدارىن اباتتاندىرۋ مەن كوشەلەردى جارىقتاندىرۋ، ءبىلىم مەن دەنساۋلىق ساقتاۋ نىساندارىن، جولدار مەن ينجەنەرلىك جەلىلەردى جوندەۋ سەكىلدى ماسەلەلەر تولعاندىرادى.

پارتيا فيليالى باسشىلىعىنىڭ مالىمەتىنشە، وسى ماسەلەلەردىڭ بارلىعى باعدارلامالاردى پىسىقتاۋ كەزىندە ەسكەرىلگەن. سونىمەن بىرگە باعدارلامانىڭ ءبىرقاتار باعىتتارى قوسىمشا پىسىقتاۋدى قاجەت ەتەدى دەپ سانايمىن.

مىسالى، قازىرگى تاڭداعى وزەكتى ماسەلەلەردىڭ ءبىرى – 13 ەلدىمەكەندە ۇيالى بايلانىسپەن قامتاماسىز ەتۋ جانە ينتەرنەتتىڭ جىلدامدىعىن ارتتىرۋ. بۇدان باسقا، قالا تۇرعىندارى بالالاردىڭ ويىن الاڭدارى ساپاسىنىڭ ناشارلىعىنا شاعىم ايتىپ، ەسكى اۆتوبۋستاردى اۋىستىرۋ ماسەلەسىن كوتەرۋدە.

تورعاي بوكسيت كەن باسقارماسىنىڭ جابىلۋى جوسپارلانۋىنا بايلانىستى 500-دەي ادامدى جۇمىسپەن قامتۋ قاجەت. سايلاۋالدى باعدارلاما اياسىندا بۇل ماسەلە پارتيالىق باقىلاۋعا الىنادى. بۇل رەتتە بوساتىلاتىن ادامداردىڭ ءبىر بولىگى قازىرگى كەزدە باسقا كاسىپورىندارعا جۇمىسقا ورنالاستى.

سولاردىڭ ءبىرى – «تورعاي ەت» ەت وڭدەۋ كەشەنى. وبلىس اكىمى ارحيمەد مۇحامبەتوۆپەن بىرگە قالادا 120-داي جاڭا جۇمىس ورنىن قۇرۋعا مۇمكىندىك بەرگەن ءوندىرىس الاڭىن ارالادىم»، - دەپ جازدى پارتيا ءتوراعاسىنىڭ ءبىرىنشى ورىنباسارى.

ساپار بارىسىندا باۋىرجان بايبەك قالانىڭ جىلۋ جۇيەسىن جاعارتۋ بارىسىمەن دە تانىستى. الداعى ۋاقىتتا ارقالىق جەس-ى مازۋت ورنىنا كومىر قولدانادى. سونىڭ ارقاسىندا 2 ميللياردقا دەيىن بيۋدجەت قاراجاتى ۇنەمدەلىپ، ونى قالانىڭ باسقا قاجەتتىلىكتەرىنە جۇمساۋعا مۇمكىندىك تۋادى. جوبانى 2021 جىلى اياقتاۋ مىندەتى «Nur Otan» پارتياسىنىڭ سايلاۋالدى باعدارلاماسىنا ەنگىزىلگەن.
سونىمەن قاتار پارتيا ءتوراعاسىنىڭ ءبىرىنشى ورىنباسارى ارقالىق ايماقتىق اۋرۋحاناسىنىڭ ۇجىمىمەن كەزدەستى.

«مەملەكەت باسشىسى ق.ك. توقايەۆ تاياۋدا سويلەگەن سوزىندە پاندەميانىڭ ەكىنشى تولقىنى بولعان جاعدايدا نەگىزگى اۋىرتپالىقتىڭ تاعى دا دارىگەرلەرگە تۇسەتىنىن اتاپ وتكەن بولاتىن. ونىڭ تاپسىرماسى بويىنشا ەكىنشى جارتىجىلدىقتا تولەماقىعا 150 ميلليارد تەڭگەدەن استام قاراجات ءبولىندى. «Nur Otan» پارتياسى فراكسياسىنىڭ دەپۋتاتتارى بيىل مەديسينا قىزمەتكەرلەرىنىڭ الەۋمەتتىك مارتەبەسىن كوتەرۋ مەن قورعاۋعا باعىتتالعان جاڭا «دەنساۋلىق تۋرالى» كودەكستى قابىلدادى»، - دەدى ب.بايبەك.

سونداي-اق، ول مەديسينا قىزمەتكەرلەرىمەن بىرگە پارتيانىڭ سايلاۋالدى باعدارلاماسىن تالقىلادى. وندا دەنساۋلىق ساقتاۋ نىساندارىنىڭ ماتەريالدىق-تەحنيكالىق جابدىقتالۋىن جاقسارتۋ جانە حالىققا مەديسينالىق قىزمەت كورسەتۋ ساپاسىن ارتتىرۋ بويىنشا ناقتى ينديكاتورلار قامتىلعان.