ق ر سەناتىنىڭ ءتوراعاسى ماۋلەن اشىمبايەۆ قازاقستاننىڭ حالىق جازۋشىسى ءابدىجامىل نۇرپەيىسوۆ جاتقان اۋرۋحاناعا ارنايى بارىپ، قالامگەردىڭ كوڭىلىن سۇرادى. بۇل تۋرالى ول facebook پاراقشاسىندا حابارلادى.
"ابەكەڭنىڭ دەنساۋلىعى جامان ەمەس. دەگەنمەن، سوڭعى كەزدە بولعان قايعىلى جاعداي اعامىزعا اۋىر تيگەنى انىق. اجار اپامىزدىڭ جاتقان جەرى جارىق، توپىراعى تورقا بولسىن.
وسىدان بىرنەشە كۇن بۇرىن اعامىز 96 جاسقا تولدى. جالپى، ءابدىجامىل اعا ماعان قاجىر-قايرات پەن ەرىك-جىگەردىڭ سيمۆولىنداي كورىنەدى. حح عاسىردا حالقىمىزدىڭ باسىنان نەبىر قيىندىقتار ءوتتى. سونىڭ ءبارى ابەكەڭە دە از زاردابىن تيگىزگەن جوق. سوعىس جىلدارىندا اعامىز قان مايداننىڭ قاق ورتاسىندا ءجۇردى. ودان كەيىنگى قيىندىقتاردى دا كوردى.
قايسارلىق پەن قاجىرلىقتىڭ وزىق ۇلگىسىن كورسەتىپ، ادەبيەتكە ايانباي ەڭبەك ەتتى. مادەنيەتىمىز بەن رۋحانياتىمىزعا ولشەۋسىز ۇلەس قوستى. قازاق ادەبيەتىنىڭ ناعىز كلاسسيگىنە اينالدى.
كەيدە ءابدىجامىل اعاعا قاراپ، حالقىمىزدىڭ وتكەن عاسىرداعى شەجىرەسىن كورگەندەي بولامىن. شىن مانىندە، ابەكەڭنىڭ ءوزى دە، ءسوزى دە، جازعان دۇنيەسى دە تاريح.
سوڭىنا مول مۇرا قالدىرىپ، عاسىرمەن، ۋاقىتپەن ءوز ەسەبىن تاپقان، قازاق ادەبيەتىنىڭ الىبى ءارى ابىزى بولعان ابەكەڭە مىقتى دەنساۋلىق، اماندىق تىلەيمىز.
جاساي بەرىڭىز، ارداقتى ابە!" دەلىنگەن سەنات ءتوراعاسىنىڭ جازباسىندا.
پىكىر قالدىرۋ