24 قازاندا شىمكەنت قالاسىنىڭ تەمىر جول ستانسياسىندا №117 باعىتىنداعى 13 ۆاگون جولدان شىعىپ اۋدارىلعان. قايتىس بولعاندار مەن زارداپ شەككەندەر جوق. وقيعانىڭ سەبەپتەرى انىقتالىپ جاتىر. بۇل تۋرالى ق ر تجم رەسمي وكىلى تالعات ءۋالي حابارلادى.

رەسمي وكىل سوزىنشە، ۆاگوندار بوس، قۇرامىندا 21 ۆاگون بولعان.

وقيعا وزگە پويىزداردىڭ قوزعالىسىنا دا اسەر ەتكەن. قولدا بار دەرەككە ساي، 5 جولاۋشى جانە 10 جۇك پويىزى توقتاپ تۇر.

"قازىرگى ۋاقىتتا جوندەۋ-قالپىنا كەلتىرۋ جۇمىستارى جۇرگىزىلۋدە، «قتج» اق-نىڭ 200 قىزمەتكەرى، شىمكەنت، ارىس جانە تاراز ستانسياسىنان 3 بىرلىك قالپىنا كەلتىرۋ پويىزى جۇمىلدىرىلدى.

وقيعا ورنىندا شىمكەنت قالاسى تجد 6 قىزمەتكەرى جانە 3 بىرلىك تەحنيكاسى، شىمكەنت ستانسياسى ىشكى ىستەر جەلىلىك پوليسيا ءبولىمىنىڭ 10 قىزمەتكەرى جانە 1 بىرلىك تەحنيكاسى جۇمىس ىستەۋدە. جولدى بوساتۋ باعىتىندا جۇمىستار جۇرگىزىلىپ جاتىر.

24 قازان ساعات 13.00-گە دەيىن پويىزداردىڭ قوزعالىسى ءۇشىن ءبىر جولدى قالپىنا كەلتىرۋ جوسپارلانۋدا" دەپ حابارلادى تالعات ءۋالي.