– مەن قايدان ءسالافي بولام، ەگەر سوعىم سويسام، تۇساۋ كەسسەم، دومبىرا تارتسام. ءبىز كەرىسىنشە اكە-شەشىسىن "كاپىر" دەپ قولىنان تاماق جەمەي جۇرگەن، قىزداردىڭ تاعدىرىمەن ويناپ، بىرىنەن كەيىن ءبىرىن تالاق قىپ، قانشاما قىزدىڭ كوز جاسىنا قالىپ جاتقان نەمەسە ناماز وقىماعان ادامدى "كاپىر" دەپ ونىمەن ارالاسپاي، اكە-شەشەسىنىڭ قولىنداعى تاعامدى "حارام" دەپ ونى جەمەي جۇرگەن قانشاما راديكالدىق كوزقاراستاعى سالافيلەردىڭ كوزىن اشۋعا، ولارعا تۇسىندىرۋگە، ولارمەن "ەلدىك مۇددەدە ءبىر جولدا بولىڭدار" دەگەن شاقىرۋمەن اينالىسىپ جاتقانىمىزعا ونداعان جىل بولدى. ءبىز ءبىرىنشى كۇننەن راديكاليزممەن قانشاما شايقاستار مەن قىرىلىستار جۇرگىزىپ كەلەمىز، – دەگەن ول "سالافيلەرگە قارسىلىعى تۋرالى، ولاردىڭ ۇلتتىق مۇددەگە قايشىلىقتارى جايلى، ەلدىڭ ىنتىماق-بىرلىگىنە زيانى تۋرالى سۇحباتتاردا، اڭگىمەلەردە اشىق ايتىپ جۇرگەنىن اتاپ ءوتتى.

– شەيحتىڭ "اسىل ارناعا" كەلىپ كەتكەنى، مەنىڭ ارابپەن ىم-جىمىم ءبىر ەكەنىن، مۋزىكانىڭ كەيبىر تۇرلەرىن باعدارلاماعا قولدانا الماي جاتسام، مەنىڭ ءباسىبۇتىن مۋزىكاعا قاتىستى كوزقاراسىمدى بىلدىرمەيدى. قايرات جولدىباي دومبىرا تارتپايتىن شىعار. ءبىراق مەن دومبىرامەن ارناۋىمدى ايتىپ، كەشەگى پاندەميا كەزىندە اينۇرعا (تۇرسىمبايەۆا – رەد.) ارناعان سالەمىمدى الەۋمەتتىك جەلى ارقىلى بۇكىل قازاقستان كوردى. ونى مەن ولەڭ قىلىپ وقىپ بەرسەم بولار ەدى، مەن ءبىراق سانالى تۇردە قازاقتىڭ اۋەزدى انىنە سالىپ، اينۇرعا جەتكىزگەنىمدى قازاق حالقى بىلەدى. ءبىز كىمگە قالاي قاراساق، كوزىمىزگە سولاي بولىپ كورەتىنى بەسەنەدەن بەلگىلى. مەن ءسالافي ەمەس ەكەنىمدى ءوزىم دە ايتايىن، وزگەلەر دە بىلەدى. مەنى تانيتىندار، مەنىڭ ۇيىمدە بولىپ جۇرگەن، قىزمەتتەس بولىپ جۇرگەن نەمەسە ساپارلاس بولىپ جۇرگەن ادامدار ەل "ءسالافي" دەپ ايتىپ جاتقان ادامدارعا ەش قاتىسىم جوق ەكەنىن انىق بىلەدى، – دەدى اقىن.